Оқу-ағарту министрлігі суицид оқиғаларынан кейін ата-аналарға нұсаулықтар әзірледі

Алматыда болған жеті суицид оқиғасынан кейін Оқу-ағарту министрлігі ата-аналарға арналған нұсқаулықтар әзірледі. Себебі өз-өзіне қол салғандардың төртеуі - оқушы, екеуі  - студент.

Екі тілде жазылған жадынамаларды мұғалімдер ата-аналарға таратып жатыр.

Онда баланың мінез-құлқындағы қандай өзгерістерге мән беру керек екені және оған қалай көмектесуге болатыны айтылған.

Интернетте өзі туралы жеке деректермен (үйінің мекенжайы, телефон номері, отбасы туралы мәліметтер, геолокация) бөлісуге, Telegram, Вконтакте, TikTok секілді әлеуметтік желілердегі қауіпті топтарға қосылуға болмайды деген секілді түрлі нұсқаулықтар берілген.

Әлеуметтік желідегі қауіпті топтардың тізіміне «Синий кит», «Тихий дом», «Разбуди меня в 4.20», «Млечный путь», «Море китов», U19, F57, «Беги или умри», «Киты плывут вверх», f58, «Рина», «Ня.пока», «50 дней до моего...», «Красный дельфин», «Союз нервных клеток», «Honey moon», «Союз Ян» және тағы да басқалары енгізілген.

Сондай-ақ балаларға оқуға болмайтын әдебиеттердің де тізімі де жарияланып отыр: «Цветы пиона на снегу», «Сплетни и K-POP», «Пока не погаснет последний фонарь», «Единственный конец злодейки – смерть», «Начало после конца», «Хаски и его учитель белый кот», «Магистр дьявольского культа», «Злодейский путь» және т.б.

Қауіпті онлайн-ойындар қатарында Schoolboy runaway және GachaLife аталған.

Ата-аналарға балалардың әлеуметтік желіде жазылған парақшаларын және достарының тізімін бақылап отыру керек.

- Анонимді профильдерге немесе сатанистік таңбалар, белгілер, иероглифтер, иврит және арабтың өрме жазуы, санскрит қаріптері, аниме суреттері және т.б. көрсетілген профильдерге назар аударыңыз, - делінген жадынамада.

Сонымен қатар онда бала құқықтары жөніндегі өңірлік уәкілдер мен психологиялық қолдау орталықтарының байланыстары берілген.

Фото: zg66.ru