Атырау облысында жалпы ішкі өнім 6,7 трлн теңгеге жетті

Биыл Атырау облысында жарты жылдың ішінде жалпы ішкі өнімнің көлемі 6,7 трлн теңгеге жетті. Бұл туралы облыс әкімі Серік Шәпкенов мәлім етті.

— Биыл жарты жылда облыста жалпы ішкі өнімнің көлемі 6,7 трлн теңгеге жетті. Осылайша республиканың жалпы ішкі өніміне біздің облыстың экономикасы 12,7% үлес қосып отыр. Сондай-ақ биыл 10 айда өңірге түскен салық және басқа да түсімдердің көлемі 3,6 трлн теңгені құрайды, — деді Серік Шәпкенов облыстың биылғы әлеуметтік-экономикалық даму барысы туралы есеп бере тұрып. 

Одан әрі әкім өңір дамуына инвестиция тарту шараларына тоқталды. 

— Қаңтар-қазан айларында өңірде 1,7 трлн теңге көлемінде инвестиция құйылды. Оның ішінде 1,1 млрд АҚШ доллары шетелден тікелей тартылды. Бүгінде Теңіз кен орнында «Болашақ кеңейту» жобасы аяқталуға жақын, биыл бұл жобаға 840 млрд теңге инвестиция тартылды. Сонымен қатар 17 инвестициялық жобаны іске асыру жоспарланған. Бүгінде жалпы құны 46,1 миллиард теңгеден асатын 8 жоба іске қосылды. Жалпы жыл соңына дейін аймақта құны 24,2 млрд теңге болатын 9 инвестициялық жоба жұмысын бастайды деп жоспарлап отырмыз, - дейді ол. 

Сондай-ақ Серік Шәпкенов еліміздің мұнай-газ химиясының дамуына серпін беретін полиэтилен өндіретін газ өңдеу зауытының салынып жатқанын айтты.

Фото: sendit.ru