Германия Қорғаныс министрлігінің өкілі Германияның “Ресеймен соғыс жоспары” жоқ екенін айтты, деп хабарлайды Malim.kz. DW-ге сілтеме жасап.
Германия қарулы күштері “Ресеймен соғыс жоспарын ешқашан әзірлемеген”, – деп мәлімдеді Германия Қорғаныс министрлігінің өкілі Кристиане Ноак 29 қараша күні DW басылымына. Оның бұл сөзі The Wall Street Journal басылымы жариялаған материалға қатысты айтылды. Онда бундесвер жасаған “Германияның Оперативтік жоспары” (OPLAN DEU) туралы жазылып, мақаланың тақырыбы: “Германияның Ресеймен соғысқа арналған құпия жоспары” деп берілген.
Ноактың айтуынша, OPLAN DEU “елдің және НАТО-ның әскери қорғаныс элементтерін Германия аумағында қажетті азаматтық инфрақұрылыммен біріктіреді, сондай-ақ альянстың логистикалық қажеттіліктерін және әскери-азаматтық өзара іс-қимылды есепке алады”.
“Бұл құжат құпия. Ұлттық қауіпсіздікке байланысты оны жүктеп алу мүмкін емес”, – деді Ноак.
Ол Германия НАТО мүшесі ретінде альянстың қорғаныс жоспарларын басшылыққа алатынын және оларды әзірлеуге белсенді қатысатынын атап өтті. Алайда 1400 беттен тұратын OPLAN DEU – бұл ұлттық неміс жоспары.
Ноактың айтуынша, “НАТО-ның қорғаныс жоспарлауы мен OPLAN DEU бір-бірімен тығыз байланысты және үнемі өзгеріп отырады. Сондықтан OPLAN DEU 2023 жылы дайын болған және аяқталған құжат емес. Ол үнемі жетілдіріледі және қайта қаралады”.
