Кір жуғыш машина тұрмысты айтарлықтай жеңілдеткенімен, оған кез келген затты ойланбастан сала беруге болмайды. Кейде қарапайым ғана қателік киімді бүлдіріп қана қоймай, техниканың жұмысына да кері әсер етеді. Өндірушілер барабанды шамадан тыс толтыру, қалтадағы ұсақ заттарды ұмытып кету және мата түріне сәйкес келмейтін режимді таңдау жиі мәселе туғызатынын ескертеді, деп хабарлайды Malim.kz.
Қалтаны міндетті түрде тексеріңіз
Киімді машинаға салар алдында оның қалталарын қарап шығу керек. Тиын, кілт және басқа қатты немесе өткір заттар жуу кезінде киімге зақым келтіруі мүмкін. Maytag нұсқаулығында қалталарды босатып, сыдырманы жауып, ілгектер мен түймелерді бекітіп барып жуу ұсынылады.
Қалтада қағаз майлық қалып кетуі де жағымсыз нәтиже береді. Жуу кезінде ол ұсақталып, киімге жабысады. Өндіруші қалтада қалған қағаз бен майлық киімдегі түктің көбеюіне себеп болуы мүмкін екенін де атап өтеді.
Үлкен көрпе мен ауыр заттарды абайлап жуыңыз
Құрғақ кезінде аса ауыр көрінбейтін көрпе немесе қалың төсек жабдығы су сіңіргеннен кейін едәуір ауырлайды. Соның салдарынан барабандағы салмақ біркелкі бөлінбей, машина қатты дірілдеуі мүмкін.
Maytag ірі әрі суды көп сіңіретін заттарды жуарда олардың затбелгісін тексеруді және нақты кір жуғыш машинада жууға жарамды екеніне көз жеткізуді ұсынады. Үлкен немесе ауыр заттар дұрыс орналастырылмаса, барабанда тепе-теңдік бұзылуы мүмкін.
Сондықтан көрпе, плед немесе басқа көлемді бұйымды машинаға салмас бұрын құрылғының рұқсат етілген жүктемесін тексерген дұрыс.
Барабанды лық толтыруға болмайды
Бірнеше рет кір жумау үшін барабанға барынша көп киім салғыңыз келуі мүмкін. Бірақ бұл уақытты үнемдеудің тиімді тәсілі емес.
Samsung мәліметінше, шамадан тыс жүктелген машинада киім нашар жуылады. Тұрақты түрде артық жүктеу техниканың бөлшектеріне де қосымша күш түсіреді. Киім барабан ішінде еркін орналасуы керек.
Maytag та киімдердің жуу кезінде еркін қозғалуына жеткілікті орын қалдыруды ұсынады. Барабан тым тығыз толтырылса, киім дұрыс шайылмай, бір-біріне оралуы мүмкін.
Киімнің затбелгісін елемеуге болмайды
Киімнің ішкі жағындағы кішкентай затбелгіде оны қалай күту керегі көрсетіледі. Кейбір маталарға жоғары температура жарамайды, ал кейбір бұйымдарды машинада мүлде жууға болмайды.
Әсіресе көлемді бұйымдарды салмас бұрын оның машинада жууға жарамды-жарамсыз екенін тексеру қажет. Өндірушілер жуу кезінде киімнің күтім белгісіндегі нұсқаулықты сақтауды ұсынады.
Ұзын бау мен ілгектерді бос қалдырмаңыз
Капюшонның бауы, белдік, ұзын жіптер және басқа салбырап тұрған бөлшектер жуу кезінде басқа киімдерге оралып қалуы мүмкін.
Maytag жуу алдында бауларды байлап, сыдырмаларды жауып, ілгектерді бекітуді ұсынады. Бұл матаның ілініп, жыртылып кету қаупін азайтады.
Жуғыш ұнтақты көп салса, киім таза бола ма?
"Ұнтақ көп болса, кір жақсы кетеді" деген түсінік әрдайым дұрыс емес. Samsung жуғыш затты қаптамада көрсетілген мөлшерден артық қолданбауды және оны тек арнайы бөлікке салуды ұсынады. Артық немесе дұрыс қолданылмаған жуғыш зат машинаның ішінде қалдық жиналуына және жұмыс сапасының төмендеуіне әсер етуі мүмкін.
Бірнеше қарапайым әдет техниканың қызмет мерзімін ұзартады
Кір жуар алдында қалталарды тексеру, киімнің күтім белгісін оқу, барабанды шамадан тыс толтырмау және ірі заттарды машина сыйымдылығына қарай жуу көп уақыт алмайды. Бірақ осы қарапайым әрекеттер киімді де, тұрмыстық техниканы да артық зақымнан қорғауға көмектеседі.
