Британиялық мұнай компаниясы Қазақстанға қарсы арыз-шағым түсірді

Британиялық Victoria Oil&Gas мұнай компаниясы Энергетикалық хартия ережелеріне сүйеніп, Қазақстанға қарсы талап-арыз түсірді. Бұл туралы Kazinform.kz-ке сілтеме жасап Malim.kz хабарлайды. 

Арыз Инвестициялық дауларды реттеу жөніндегі халықаралық орталықта (ICSID) тіркелді. 

Energy Monitor қоғамдық қорының Telegram арнасының хабарлауынша, 2021 жылдың сәуір айында компания Қазақстанға қарсы жүздеген миллион доллар талап ететін арыз беретінін мәлімдеген еді. Бұл талап Атырау облысындағы Кемеркөл кен орнын барлау және игеру туралы келісімшарттың бұзылуынан туындаған.   

Energy Monitor қоғамдық қорының директоры Нұрлан Жұмағұлов аталған талап-арыздың саяси астары да бар екенін атап өтті.

Стати ісімен салыстырғанда (Боранкөл мен Толқын кен орындары) Кемеркөл кен орны жүздеген миллион доллар шығынды ақтайтындай ауқымды емес. Сондықтан бұл талап-арыздың экономикалықтан гөрі саяси мәні басым деп ойлаймын, - деді ол. 

Оның айтуынша, Victoria Oil&Gas 2005 жылы Saga Creek Gold Ltd компаниясынан Кемеркөл кен орнының 100% үлесін 8,5 миллион доллар қаржыға сатып алған. Компания бірнеше ұңғыма бұрғылап, 15 миллион тонна мұнай қоры барын анықтаған. Алайда, 2008 жылы жер қойнауын пайдалану келісімшарты күшін жойды, себептері еш түсіндірілмеді.

Сол жылы Кемеркөл кен орнына құқық «Bakyt Tau» ЖШС-не 360 миллион теңгеге берілді, ал 2016 жылы «Ап-Нафта Оперейтинг» ЖШС-не 1,36 миллиард теңгеге сатылды.

Фото: freepik