Мейіржан Төребаев пен Мейірхан Шерниязов бостандыққа шығаруды өтінді

Вайнерлер Мейіржан Төребаев пен Мейірхан Шерниязов жазасын өтеп жатқан бес жылдық мерзімін жеңілдетіп, бостандыққа шығару туралы өтініш берген. Бұл туралы Kozachkov offside телеграм-арнасы жазды, деп хабарлайды Malim.kz.

Арнаның жазуынша, олар өтінішпен Алматы қаласының Түрксіб аудандық сотына жүгінген.

Екеуі бүгінде жазасының үштен бірін өтеп қойған. Сондықтан вайнерлер негізгі жазаны айыппұлға ауыстыру туралы өтініш түсірген.

Ал ел заңнамасында мұндай мүмкіндік қарастырылған, бірақ бірнеше шарты бар:

Сотталушы жазасын өтеп жатқан мекемеден жақсы мінездеме алуы керек;

Тәрбие және спорттық іс-шараларға қатысуы қажет;

Ең маңыздысы – сот белгілеген шығынды өтеуге тиіс.

Мейіржан Төребаев пен Мейірхан Шерниязовқа мінез-құлықтың бірінші оң дәрежесі берілген. Егер олар «Mudarabah Capital» клиенттеріне келтірілген шығындарын өтесе, бостандыққа шығуға толық мүмкіндіктері бар. Сот олардың өтінішін келесі аптада қарамақ.

Айта кетейік, былтыр 23 маусымда Алматы қаласының Алмалы аудандық соты Mudarabah Capital қаржы пирамидасына қатысты қылмыстық іс бойынша бірнеше адамды соттаған еді. Сотта 12 адам жауапқа тартылып, олардың қатарында Мейіржан Төребаев пен Мейірхан Шерниязов та болды. Екі вайнер де Қылмыстық кодекстің 217-бабы («Қаржылық (инвестициялық) пирамиданы құру және басқару») бойынша кінәлі деп танылып, әрқайсы 5 жылға бас бостандығынан айрылды. Басқа фигуранттар 262-бап («Ұйымдасқан топты, қылмыстық ұйымды құру және басқару, сондай-ақ оларда қатысу») бойынша сотталып, түрлі мерзімге қамалды.

Фото: qaz365.kz