Павлодарда майнинг жабдықтары тәркіленген ресейліктің шағымы өзгеріссіз қалды
Ол жабдықтарды лицензиясын сыртқа шығарғысы келген
![](/images/article-img/1600/23224-1720849512-m.jpg)
Павлодар облыстық сотында майнингтік жабдықтарды лицензиясыз экспорттау фактісі бойынша 2 әкімшілік іс қаралды, деп хабарлайды Malim.kz.
Облыстық сот мәлімдеуінше, Ресей азаматы Қазақстанда шамамен 4 миллион теңгеге майнинг жабдықтарын сатып алып, оны уәкілетті органдардың лицензиясын алмай-ақ шетелге шығаруға тырысқан. Осы әрекеттері үшін аудандық сот ресейлік азаматты ӘҚБтК-нің 436-бабының 1-бөлігі бойынша әкімшілік жазаға тартқан. Одан майнингтік жабдықтар тәркіленіп, оған 55 мың теңге айыппұл салынған.
Айыппұлды төлегеннен кейін құқықбұзушы сот қаулысының тәркілеу туралы бөлігіне апелляцияға шағымданады. Ол қаулының күшін жойып, тәркіленген тауарды кері қайтаруды сұрап, оған тиісті лицензия алатынын айтып, уәде береді.
Облыстық сот алқасы мыналарды назарға алған:
майнинг жабдығының экспорты ұлттық қауіпсіздік мақсатында бақыланатын әрі екі мақсатта пайдаланылатын ерекше тауарларға жатады;
ресейлік жабдықты тек экспортқа шығару мақсатында сатып алған, өзі Қазақстанда тұрмайды, тіркеуде жоқ.
Жоғарыда айтылған мән-жайларды ескере келіп, алқа бірінші сатыдағы сот қаулысының тәркілеу бөлігінің күшін жоюға құқықтық негіз таппады. Сондықтан шағым қанағаттандырусыз қалдырылды. Сол негіздер бойынша басқа азаматқа қатысты басқа іс бойынша қаулы да өзгеріссіз қалдырылды. Қаулылар заңды күшіне енді, деп жазды облыс соты.
Айта кетейік, майнингтік жабдықтар (биткоин өндіруге арналған майнингтік сервер) заң бойынша ерекшелігі бар тауарларды бақылау саласында екі мақсатта пайдаланылатын тауарларға жатады. Оны әскери мақсатта да қолдануға болады. Осыған байланысты мұндай жабдықтың экспортын ұлттық қауіпсіздікті қамтамасыз ету үшін арнайы лицензия алу арқылы мемлекет бақылайды.
Фото: sia.ru
Байланысты жаналықтар
MalimBlocks
![](/images/article-img/600/24542-1725551478.jpg)