«ҚазАвтоЖол»-ға 1 млн теңгеден астам айыппұл салынды
Жолдарды күтіп ұстамағаны үшін 160 лауазымды қызметкер әкімшілік жауапкершілікке тартылды
Батыс Қазақстан облысы аумағы арқылы өтетін халықаралық және республикалық маңызы бар жолдарға жүргізілген зерттеу нәтижелері бойынша көптеген кемшілік анықталды.
БҚО полиция департаментінің баспасөз қызметінен мәлім еткеніндей, шұңқырлар мен ойықтар, жолдың шөгуі, сондай-ақ жол белгілерінің болмауы көлік қозғалысына тікелей әсер етеді. «Осыған байланысты БҚО полиция департаментінің әкімшілік полиция басқармасы «ҚазАвтоЖол» ҰК» АҚ Батыс Қазақстан облысы бойынша филиалының атына орындау мерзімдерін белгілей отырып, кемшіліктерді жою туралы нұсқама жолдаған болатын. Алайда қайтадан тексеру кезінде кемшіліктердің жойылмағаны, нұсқамалардың орындалмағаны белгілі болды. Сондықтан аталмыш филиалға қатысты ҚР Әкімшілік құқықбұзушылық кодексі 462-бабы 3-бөлігіне сәйкес әкімшілік іс қозғалып, сот тәртібімен 1 млн 292,2 мың көлемінде айыппұл салынды. Жалпы, биыл жеті айдың қорытындысы бойынша БҚО полиция департаментінің бөліністері жолдарды тиісінше күтіп ұстамағаны үшін 160 лауазымды қызметкерді, соның ішінде 70 бірінші басшыны әкімшілік жауапкершілікке тартты», - деп хабарлады ведомстводан.
Фото: БҚО полиция департаменті
Байланысты жаналықтар
MalimBlocks
