Қостанайда қоғамдық көлікті жүргізуші мас күйінде айдаған
Көлік айып тұрағына қойылды. Өзі қамауға алынуы мүмкін
Қостанай қаласында 29 жастағы маршруттық автобус жүргізушісі алкогольдік масаң күйде көлік басқарғаны үшін ұсталды деп хабарлайды Malim.kz.
Polisia.kz жазуынша, ол күнделікті жолаушылар тасымалымен айналысқан. Үзіліс кезінде сыра ішкен жүргізушіні сапарға қайта шыққанда патрульдік полиция байқап, тоқтатқан. Медициналық куәландыру оның орташа дәрежеде масаң болғанын растаған. Бұған қоса, жүргізушінің міндетті сақтандыру полисі де болмағаны анықталған. Полиция өкілдері автобустың жеке кәсіпкердің атында тіркелгенін және жолға шығар алдында міндетті техникалық тексерістен өтуі тиіс екенін хабарлаған.
Daimler Benz көлігі арнайы айыптұраққа қойылды. Жүргізушіге екі әкімшілік жаза қолданылуы мүмкін: ол 15 тәулікке қамауға алынып, 7 жылға жүргізуші куәлігінен айырылады. Сонымен қатар, сақтандыру полисінің болмағаны үшін шамамен 40 мың теңге айыппұл төлеуге міндеттеледі. Автобусты сақтандырусыз жолға шығаруға рұқсат берген механик те жауапкершілікке тартылады, деп жазды полиция.
Бұл оқиғадан бөлек, Қостанайда тағы бір маршруттық автобус жүргізушісі ұсталған. Ол алдыңғы әйнегі сынған автобусты жүргізген. Бұл заңбұзушылықты бір жыл ішінде қайталап жасаған болып шықты. Оның көлігі де айыптұраққа қойылған. Жүргізуші мен автобусты жолға шығаруға рұқсат берген механикке әкімшілік шаралар қолданылмақ.
Полиция қызметкерлері елімізде «Тасымалдаушы» жедел-профилактикалық іс-шарасы өтіп жатқанын еске салады. Оның алғашқы күні Қостанай облысында такси және шағын автобус жүргізушілерінің жол қозғалысы ережесін бұзған 74 дерегі тіркелді. Сондай-ақ, заңсыз тасымалмен айналысқан 8 жүргізуші мен жолаушыларға такси қызметін рұқсатсыз ұсынған 10 азамат анықталды.
Фото: polisia.kz
Байланысты жаналықтар
MalimBlocks
