Шерзат Болаттың әпкесі Қазақстаннан қудалана ма? Адвокат жауап берді
Бақыт қазір Ұзынағаштағы уақытша ұстау изоляторында
Талғардағы жанжал кезінде қаза тапқан жасөспірім Шерзат Болаттың әпкесі, Қаржаубай Нұрымовтың қарындасы Бақыт Реимова «митингке үндеді» деген айып тағылып, 15 тәулікке жабылған болатын.
Сонымен қатар Реимованы сот Қазақстаннан депортациялау жөнінде шешім шығарған. Бірақ адвокаты мұнымен келіспейтінін мәлімдеді.
Блогер Жан Ахмадиев адвокат Мейірман Шекеевтің пікірін сұраған екен. Ол қазір осы іспен айналысып жатыр.
- Бақыт қазір Ұзынағаштағы уақытша ұстау изоляторында. Біз сол жерге барып қайттық. Апеляциялық шағымды дайындап қойдық. Оған Әкімшілік кодекстің 488-бабының 8-бөлігі бойынша айып тағылған. Яғни шетелдіктер, азаматтығы жоқ адамдар жасаған әрекет бойынша қамауда отыр. Қазақстаннан депортациялау жөнінде жаза кесілген. Біз мұнымен келіспейміз. Қаулыда бірнеше заңбұзушылық бар. Бақытқа заңсыз демонстрация, пикетке үндеді деген айып тағылған. Бірақ заңдағы анықтамаға сәйкес мұндай заңсыз жиынға шақырудың ұйымдастырушысы болады. Реимованың ондай кінәсі дәлелденбеген. Сосын баласының құжатын сұратқан. Баласы Қазақстанда дүниеге келген. Бала мен ананы ажыратуға болмайды. Қазақстан ана мен баланы ажыратпауға міндетті. Сот осы халықаралық шартты өрескел бұзған. Бақыттың этникалық қазақ екені ескерілмеген. «Қандас» деген құжаты бар. Оларды депортациялауға болмайды. Өйткені баратын жері жоқ. Отаны – Қазақстан. Біз кінәсіздігін дәлелдеп, Қазақстанда қалдыруға тырысып жатырмыз, - дейді Мейірман Шекеев.
Бұған дейін Шерзаттың әкесі Қаржаубай Нұрымов сот шешімімен 15 тәулікке қамалған еді.
Фото: BES.media
