Ақтөбедегі оқушы өлімі: мектеп директоры қызметінен босатылды
Оқиға 2 қыркүйекте Кеңесту ауылында болған
Ақтөбе облысының Темір ауданында оқу жылының басында мектеп оқушысын өлтіріп кетті. Бұл іске еліміздің Бас прокуроры араласып, облыс прокуроры Халидулла Дәуешовке сотқа дейінгі тергеуді жеке бақылауына алуды тапсырды.
Айта кетелік, оқиға 2 қыркүйекте Кеңесту ауылында сабақтан тыс уақытта болған. Оқушылар арасындағы жанжал қайғылы жағдаймен аяқталды. Күдікті ретінде кәмелет жасқа толмаған екі жасөспірім қамауға алынды.
- Темір ауданының соты екі ай мерзімге қамауда ұстау түріндегі бұлтартпау шарасына санкция берді, - деп хабарлады облыстық прокуратураның баспасөз қызметі.
Тергеуді Ақтөбе облыстық полиция депаратментінің қызметкерлері жүргізіп жатыр. Оқиғаның мән-жайы мен себептерін анықтау үшін ауданға арнайы комиссия жіберілді.
Сондай-ақ облыс прокуратурасы Темір ауданы әкімінің, білім басқармасының және ауданның лауазымды тұлғаларының жауапкершілігі туралы мәселе көтеріп, жергілікті атқарушы органның атына ұсыныс енгізді.
Қадағалау актісі бойынша мектеп директоры қызметінен босатылды. Өзге ақпарат тергеу құпиялығына байланысты жарияланбайды.
Фото - © rawpixel.com/Freepik
