Қайғылы оқиға 10 мамырда күндіз Жетісу облысы Кербұлақ ауданындағы Көксу өзенінде болды, - деп хабарлайды Malim.kz тілшісі Tengrinews.kz-ке сілтеме жасап.
Ер адам тартылған темір арқанмен өзеннен өтпек болған сәтінде суға құлап, ағынмен ағып кеткен. Оның денесі әлі табылған жоқ.
"Расталмаған ақпарат бойынша, суға батып кеткен адам — Отардан келген әскери қызметкер болуы мүмкін. Ресми мәлімдеме әлі жоқ. Ақпаратты нақты білетін адамдар растаса не теріске шығарса екен", – делінген әлеуметтік желіде тараған видеожазбаның сипаттамасында.
"Н. есімді азаматтың жоғалу дерегі бойынша полиция қылмыстық іс қозғады. Полиция қызметкерлері, әскери қызметкерлер, құтқарушылар, басқа да мекеме өкілдері мен қарапайым тұрғындардан құралған топ ауқымды іздестіру шараларын ұйымдастырды. Іздестіру жұмыстары жалғасып жатыр", – деді Жетісу облыстық полициясы.
Жетісу облысының Төтенше жағдайлар департаменті жоғалған адамның 1989 жылы туғанын хабарлады. 11 мамырда таңғы сағат 06:30-да ТЖД, орман қорғау қызметі, жергілікті атқарушы органдар, полиция, әскери полиция мен Қорғаныс министрлігі бөлімшелері жұмылдырылған кең ауқымды іздестіру жұмыстары басталды. Барлығы 98 адам мен 22 техника, соның ішінде жүзу құралдары, дрондар және спутниктік байланыс жүйелері тартылған.
"Іздеу жұмыстары Көксу өзенінің екі жағалауында (оң жағында – 4, сол жағында – 4 топ) 35 шақырымдық аумақта жүргізілді. Кешкі 18:30-да қараңғы түскен соң жұмыстар уақытша тоқтатылды. Іздеу 12 мамырда жалғасады", – делінген хабарламада.
Фото: видео кадры
