Павлодар облысында мұғалім жетім балаға арналған пәтерде заңсыз тұрып келген

Павлодар облыстық прокуратурасы Железин ауданында мемлекеттік тұрғын үйді бөлу кезінде заңбұзушылықтар болғанын анықтады, - деп хабарлайды Malim.kz тілшісі.

Атап айтқанда, пәтерлер лауазымды тұлғаларға тұрғын үй комиссиясының алдын ала шешімі мен жалға алу келісімдерін жасамай берілген, яғни "кел де, тұра бер" принципі бойынша тәжірибе қалыптасқан.

"Мысалы, 2022 жылдан бастап Башмачинск мектебінің мұғалімі жетім балаға арналған пәтерді алып отырған. 70 жалға алушы жалға алу төлемдерін төлеу бойынша міндеттемелерін орындамағандықтан, қарыз сомасы 6,5 миллион теңгеге жуықтаған. Ал ауданның жергілікті атқарушы органы жалға алу ақысын өндіріп алу бойынша шаралар қабылдамаған", - деп атап өтті прокуратура қызметкерлері.

Жеке жағдайларда мемлекеттік тұрғын үй үшінші тұлғаларға берілген. Кезекте тұрған азаматтардың тізімінде қайтыс болған азаматтар да бар.

Ал тұрғын үйге шын мұқтаж жандарға бос тұрғын үйлер бөлінбеген (әкімдіктің балансында 65 бос тұрғын үй объектісі бар, ал тұрғын үй кезегінде 209 адам тұр).

"Мысалы, Мыңкөл ауылында төрт пәтер бос тұр, ал тұрғын үй кезегінде бес адам, олардың арасында көпбалалы отбасы, жетім балалар және әлеуметтік осал топтардың өкілдері бар", - делінген хабарламада.

Тексеру нәтижелері Мемлекеттік қызмет істері департаментінің этика жөніндегі кеңесінде қаралды, жіберілген заңбұзушылықтар үшін Железин ауданындағы нақты сектор экономикасы бөлімінің басшысы қызметтік міндеттерін толық орындамағаны үшін ескерту түрінде тәртіптік жауапкершілікке тартылды.

Фото: pixabay.com