Шымкентте терроризмді насихаттаған тұрғын сотталды
Шымкентте терроризмді насихаттаған адам сот үкімімен 8 жылға бас бостандығынан айырылды, - деп хабарлайды Malim.kz тілшісі қала прокуратурасына сілтеме жасап.
Ол Қылмыстық кодекстің 256-бабының 2-бөлігі (терроризмді насихаттау) және 296-бабының 1-бөлігі (адамдарды террористік не экстремистік әрекеттерге тарту, қаруландыру не дайындау) бойынша кінәлі деп танылып, жазаға тартылған.
"2024 жылғы қыркүйекте Шымкентте азамат "С" WhatsApp мессенджері арқылы танысы, азаматша "Т"-ға зорлық-зомбылыққа үндейтін және халықаралық террористік ұйым "Мұсылман бауырлар" идеологиясын түсіндіретін материалдар жіберген. Бұл ұйым қарулы жиһад идеясын насихаттайды. Сонымен қатар, ол Сириядағы террористік топтарға қосылуға үгіттеген", – делінген хабарламада.
Қала прокуратурасы хабарлағандай, осындай қылмыстар үшін 2023 жылы 10 адам сотталған.
Прокуратура мұндай әрекеттер үшін 5 жылдан 12 жылға дейін бас бостандығынан айыру және мүлікті тәркілеу көзделгенін ескертеді.
Фото: pixabay.com
Самое читаемое
