Теміртаудағы зейнеткерді қатыгездікпен соққыға жыққан жасөспірімдер қамауға алынды

Теміртауда зейнеткердің пәтеріне алдап кіріп, қорлық көрсеткен жасөспірімдер қамауға алынды, - деп хабарлайды Мalim.kz тілшісі. 

Қарағанды облысының прокуратурасы Теміртауда зейнеткерге шабуыл жасаған жасөспірімдердің қамауға алынғанын айтты.

Ведомство мәліметінше, бұл оқиға бойынша Қылмыстық кодекстің 191-бабы 3-бөлігі 3-тармағы бойынша ("Тонау") қылмыстық іс қозғалған.

"Күдікті ретінде танылған тоғыз адам, оның ішінде кәмелетке толмаған жеті жасөспірім Қылмыстық-процестік кодекстің 131-бабына сәйкес ұсталып, уақытша ұстау изоляторына қамалды. Теміртау қалалық соты оларды екі ай мерзімге қамауда ұстау түріндегі бұлтартпау шарасын таңдады", – делінген прокуратура хабарламасында.

"Қатаң шара қолдануға негіз болған – жасалған қылмыстың ауырлығы" деді олар. 

Қазір істің шеңберінде қажет сараптамалар тағайындалып, жан-жақты әрі объектив тергеу жүргізіліп жатыр. Сонымен қатар, жасөспірімдердің ата-аналарына қатысты балаларының тәрбиесіне салғырт қарағаны үшін де қылмыстық іс қозғалып, бөлек тергеу басталған.

Еске салайық, бұған дейін 67 жастағы зейнеткер жасөспірімдердің қорлығына ұшыраған болатын. Күдіктілер пәтерге электрик болып кірген болып, қарияны тонап, басы мен денесіне бірнеше рет аяғымен соққы жасап, балағаттап, бетіне түкірген. Әлеуметтік желіде оқиға бейнежазбасы таралғаннан кейін полиция бес жасөспірімді ұстаған. Олар бұған дейін де полицияда есепте тұрған.

Кейін әлеуметтік желілерде қарияға шабуыл жасаған жасөспірімдердің өздері де ұрып-соғылған видеосы тарады – оларға қатарластары "өз қолымен жазалау" ұйымдастырған.

Оқиғадан кейін облыс әкімінің тапсырмасымен Теміртау қаласы әкімінің орынбасарына және жасөспірімдер оқитын мектеп директорларының орынбасарларына тәртіптік жаза қолданылғаны белгілі болды.

Фото: pixabay.com