Теміртауда бірнеше жасөспірім қарияны соққыға жығып, видеоға түсірген 

Теміртауда бір топ жасөспірім 67 жастағы зейнеткерді алдап, пәтеріне кіріп, оны аяусыз ұрып-соғып, видеоға түсірген, - деп хабарлайды Malim.kz тілшісі. 

Әлеуметтік желілерде бұл жағдайдың кадрлары жарияланды. Видеода жасөспірімдердің қарияны беттен ұрып, оған түкіріп, балағаттап жатқаны көрінеді.

Әлеуметтік желідегі ақпаратқа сәйкес, жасөспірімдер өздерін электр жөндеушіміз деп таныстырып, қарияның үйіне кірген.

Қарағанды облысы полиция департаментінің мәліметінше, жасөспірімдердің жеке тұлғалары анықталған.

"Бұл оқиғаны полиция учаскелік инспекторлары профилактикалық жұмыс аясында – бейнежазба әлеуметтік желіде жарияланғанға дейін анықтады. Барлық кінәлі, соның ішінде кәмелетке толмағандар ұсталып, уақытша ұстау изоляторына қамалды. Кәмелетке толмағандардың заңды өкілдері тиісті тәрбиелік шараларды орындамағаны үшін жауапқа тартылады", – деп мәлімдеді ведомстводан.

Айта кетейік, барлық жасөспірім профилактикалық есепке қойылды.

Фото: pixabay.com