Әлеуметтік желіде әдепсіз сөз айтқан актриса 7 тәулікке қамалды
Айыпталушы сотта өз кінәсін мойындаған.
Алматы қаласының әкімшілік құқық бұзушылық істер жөніндегі мамандандырылған ауданаралық соты әнші әрі актриса Фарема Казакпаеваға қатысты істі қарады, деп хабарлайды Malim.kz.
Сотта YouTube видео хостингінде Казакпаеваның әдепсіз сөз айтқан видеоподкаст жарияланғаны анықталды. Одан әрі бұл видео басқа әлеуметтік желілерде таралған. Айыпталушы өз кінәсін толық мойындап, іс материалдарында көрсетілген айғақтарды растады.
Сот қаулысымен ӘҚБтК-нің 434-бабының 1-бөлігінде көзделген әкімшілік құқық бұзушылықты жасағаны үшін кінәлі деп танылып, оған 7 тәулік мерзімге әкімшілік қамаққа алу түріндегі әкімшілік жаза тағайындалды.
Сот қаулысы заңды күшіне енген жоқ.
Фото: instagram.com/farema_kazakpayeva
