Базар мен құрылыстағы 1,7 мыңнан астам мигрант елден шығарылды
Қазақстанда базарлар мен құрылыс нысандары тексеріліп, 1,7 мыңнан астам заңсыз мигрант елден шығарылды, деп хабарлайды Malim.kz сайты Polisia.kz-ке сілтеме жасап.
Бірнеше күн ішінде Қазақстаннан заңсыз еңбек етіп жүрген 1 700-ден астам шетелдік азамат шығарылды.
Ішкі істер министрлігінің мәліметінше, бұл деректер 2025 жылғы 13–17 қазан аралығында өткен «Нелегал-2025» жедел-профилактикалық шарасының екінші кезеңі барысында анықталған.
Барлығы – 13 061 заңбұзушылық тіркелген. 9 595 шетелдік әкімшілік жауапкершілікке тартылды, 1 770 адам ел аумағынан шығарылды, 2 759 қазақстандық азамат көші-қон заңнамасын бұзғаны үшін жауапқа тартылды, 707 жұмыс берушіге шетелдік жұмыс күшін заңсыз тартқаны үшін шара қолданылды.
Сонымен қатар 33 қылмыстық іс — мемлекеттік шекараны қасақана заңсыз кесіп өтуге, 394 іс — заңсыз көші-қонды ұйымдастыруға, 395 іс — шетелдік жұмыс күшін бірнеше рет заңсыз пайдалануға қатысты қозғалған.
Жалпы, тексеріс барысында 30 мыңнан астам шетелдік пен азаматтығы жоқ адам, сондай-ақ 2 мыңнан астам нысан (құрылыс алаңдары, базарлар, шаруа қожалықтары және жеке үйлер) қамтылды.
Фото: Polisia.kz
