Президент көмекшісі, Қазақстанның халықаралық қатынастар жөніндегі кеңесінің төрағасы Ерлан Қарин Қазан қаласындағы «Валдай» халықаралық пікірталас клубындағы кездесуде Қазақстан мен Ресей мүшелік ететін Еуразия экономика одағының пандемияға қалай төтеп бергенін айтып берді.
Қариннің сөзінше, пандемия сауда-экономика саласында қиындықтар тудырса да, нарық жаңа шарттарға икемделе білген.
“Пандемия ЕАЭО жұмысына кедергі келтірген жоқ. Одаққа мүше елдер бірлесе жылдам жұмыс атқара алатынын көрсетті. Естеріңізде болса, ЕАЭО аясында (пандемияның бастапқы кезеңінде - ред.)
тауарларды импорттау үшін «жасыл дәліз» құрылып, дәрі және дезинфекциялау құралдарын, медициналық препараттарды және өзге де заттарды өндіру үшін жекелеген компоненттер мен материалдарды ЕАЭО аумағына әкелудің бажсыз режимін енгізілген болатын” - деді Ерлан Қарин.
Қазақстан президентінің көмекшісі Қариннің айтуынша, түрлі ортақ шаралар мен онлайн-конференциялар аясында әлі де жалғасып келе жатқан саяси диалог пен өткен жылы 2025 жылға дейінгі ЕАЭО стратегиясына қол қойылғаны одақтың өміршеңдігі мен сынақтарға төтеп бере алатынын көрсетті.
“Ресей мен Қазақстан президенттерінің телефон қоңыраулары хроникасына қарап, пандемия кезінде байланыс үзілмегенін, керісінше қарқынды жүргенін байқауға болады”.
Фото: Akorda.kz
