Көлік министрлігі желіде жарияланған «қара жәшік жазбаларына» түсініктеме бермейтінін мәлімдеді
Желіде «қара жәшік жазбаларының» күмәнді мәтіні жарияланған еді
Ақтау маңында құлаған ұшақтың «қара жәшігінің жазбалары» делінген дерек әлеуметтік желіде жарияланды. Соған байланысты Көлік министрлігі түсініктеме берді, деп хабарлайды Malim.kz.
Министрліктің мәлімдеуінше, Авиациялық оқиғаның себебін анықтау жөніндегі арнайы комиссиясының жұмысы жалғасып жатыр. Алдын ала есеп жарияланғанға дейін комиссия ресми дереккөзі жоқ ғаламторда жарияланған дерекке түсініктеме бермейді.
Естеріңізге сала кетейік, Комиссия ҚР заңнамасының талаптарына және ИКАО-ның 13-қосымшасының талаптарына сәйкес алдын ала есеп жариялайды. Онда тергеу барысы және тергеу нәтижесінде анықталған нақты ақпарат болады.
Айта кетейік, бұған дейін Baza телеграм-арнасы апатқа ұшыраған AZAL ұшағының ұшқыштары мен диспетчерлер арасындағы әңгіменің «толық стенограммасын» жариялаған еді. Ондағы жазбаға қарағанда, Грозныйға қонбау, Махачқалаға ұшпау, содан кейін қайтадан Бакуге ұшу және нәтижесінде Ақтауға бағыт алу туралы барлық шешімді экипаж өз бетінше қабылдаған.
Диспетчерлер алдымен Грозныйға, содан кейін Махачқалаға қонуды ұсынған, сондай-ақ, Ресейдің басқа әуежайлары туралы деректер берген. Бірақ экипаж бұл жерлерге қонбау туралы шешім қабылдаған. Сонымен қатар, жазбаларға сәйкес, құстармен соқтығысу, сондай-ақ, борттағы газ баллонының жарылуы туралы нұсқаны диспетчерлермен сөйлесу кезінде экипаждың өзі айтқан. Жазбалардан ұшаққа сыртқы әсер болғаны байқалғанымен, ұшқыш бортта төтенше жағдай жарияламаған.
Фото: ТЖМ
Байланысты жаналықтар
MalimBlocks
