Максим Рожин: Жауапкершілік пен әдеп жоқ жерде келеңсіздік көбейеді

Кеше Ұлттық құрылтайдың алғашқы күні көп әріптесім сұхбат жазып алды. Кеше сұхбаттардың бірінде "сіз қандай ұсыныстармен келдіңіз, не мәселені көтересіз" деп сұрады журналист әріптестерім.

Мен "қоғамда орын алып жатқан әдепсіз, тіпті кейде қауіпті дүниелер мазалайды, балаларымыз үшін қорқып, мектепке дейін шығарып салып, алып кететін жағдайға жеттік, жаңалықтарда келеңсіз жайттар, көшеде тіпті жүргізушілердің төбелелсіп кететінін көретін болдық", - дедім.

Өкініштісі кейбір әріптестерім менің сөзімді "БАҚ жағымсыз жаңалықты көп таратады" деген уәж секілді түсінгендей. Ендеше тағы да түсіндірейін, БАҚ қоғамның айнасы, қоғамда не орын алады, әріптестерім соны жазады, қоғамда орын алып жатқан келеңсіз жайттарды журналистерден емес (мен өзім де журналист болдым) қоғамдағы процестерге, орын алып жатқан фактілерден көруіміз керек! Осыған әрбіріміз назар аударып, мемлекет тарапынан ортақ құндылықтарды қорғауға, сақтауға және ешкімге бұзғызбауға әрекеттену керек.

Әрине бұл жағдайлар орын алады өмір болғасын, бірақ мемлекет тарапынан, қоғам тарапынан, тіпті заң бұзылса полиция тарапынан кейде реакция тым кеш болғасын, жауапкершілік азайып, біз осыны қалыпты жағдай ретінде қабылдайтын болдық. "Ехх қоғам не болып барады..." - деп сан соғып, шаруамызды істеп кете береміз. Жауапкершілік пен әдеп жоқ жерде мұндай фактілер тек көбейе береді...

Сондықтан, бұл процестермен шұғыл жұмыстану керек, сол үшін әдеп, этика, азаматтардың бір - біріне деген толерантты көзқарас мәселесін көтеріп, сұқбатта осыны айттым.

Кейбір дүниелер Заңмен реттелмейді, қарапайым этикалық нормалармен реттеледі, жолда біреуге кедергі жасадың ба - кешірім сұра, біреуді кенеттен соғып кеттің бе, абайсыздан біреуге кедергі жасадың ба - ренжімеуін өтін, байқаусызда болғанын жеткіз.

Ал бізде осы жағдай қалыпты деңгейде ме? Әдепсіз болып барамыз, оны жаңалықтардан-ақ байқауға болады, оқушылардың бірін бірі соғып, ұрып кетуі, жүргізушілердің көшедегі төбелесі, шенеуніктердің қарапайым халыққа қатты сөйлеуі (жоқ емес, болған жағдайлар), дөрекілік, дарақылық, үлкендерді сыйламау фактілері БАҚ былай тұрсын, әлеуметтік желіні толтырып жатыр. Не істейміз? Осыны ойлану керек секілді. 

Фото: istockphoto.com