Ақмола облысының Бурабай ауданында полиция қызметкерін соққыға жыққан ағайындылар сотталып кетті, деп хабарлайды Malim.kz.
Облыстық соттың мәліметіне жүгінсек, билік өкіліне, оның қызметтік міндеттерін атқаруына байланысты, зорлық-зомбылық жасағаны үшін қылмыстық іс (ҚК-нің 380-бабының 4-бөлігі) қаралды.
«Полиция инспекторы патруль кезегін жүзеге асыру барысында, Е.-нің автокөлігін тоқтатып, құжаттарды ұсынуды сұраған. Е. құжатын беруден бас тартып, өзіне қатысты деректерді өзгертіп көрсеткен.
Жүргізуші Е.-нің шын деректерін анықтау барысында, оның көлік құралын басқару құқығынан айыру фактісі анықталды. Осыған байланысты инспектор хаттама толтыруға кіріскен. Алайда, Е. мен оның шақыруы бойынша келген ағасы О. инспектордың «мәселені сол жерде шешу» өтініштерінен бас тартуына агрессивті әрекет білдіріп, инспектордың бетінен жұдырықпен бірнеше рет соққы берген, содан кейін оқиға орнынан кетіп қалған», - делінген облыстық соттың хабарламасында.
Сот-медициналық сараптамаға сәйкес, қызметкердің денсаулығына жеңіл зиян келтірумен, мидың шайқалуы түріндегі дене жарақаты анықталды.
Сот үкімімен оларға пробациялық бақылау белгіленіп, әрқайсысына 3 жыл 6 айға бас бостандығын шектеу жазасы тағайындалды. Сот актісі заңды күшіне енген жоқ.
Фото: istockphoto.com
