Қазақстандағы ең үлкен отбасы. Бір үйде 55 бала өсіп жатыр

Қостанайдың Лисаков қаласында тұратын Шүкіровтер отбасында 55 ұл-қыз бар. Рустам мен  Муазамма бүлдіршіндерді балалар үйінен 2017 жылдан  асырап ала бастаған. Бүгінде бұл шаңырақ «Қазақстандағы ең үлкен отбасы» саналады. Бұл туралы «Таңшолпан»  бағдарламасында айтылды.    

«Бала асырап алғанға дейін, біздің 3 перзентіміз шетінеп кетті. Дәрігерлер сәбилі бола алмайсыңдар деді. Содан кейін балалар үйіне 2-і бала асырап алуға барғанбыз. Шығарда 5 ұл-қызды жетектеп шықтық. Барғаннан кейін бәрін алып кеткіміз келді. Өзіміз де көпбалалы үйден шыққанбыз», - дейді Рустам Шүкіров.

Отағасы Рустам Шүкіров 20 жылдан астам уақыт жеке кәсіппен айналысады. Ал Муазамма Мансұрова үйде балаларды тәрбиелеп отыр.  

Үйдің кенжесі Эмиль 3 жаста. Ересектері мектеп бітіріп, қалаға оқуға кеткен. Мереке күндері бәрінің басы қосылып, шат-шадыман болады. Балалардың арасында компьютерді үздік меңгергендері де бар. Оқу үлгерімдері де жақсы. Бір-біріне  көмектесіп, үйге берілген тапсырманы мұқият орындайды. Ал үйдің еркесі Әзиза, биыл бірінші сыныпқа барды. 

Балалар 30 литрлік қазаннан тамақтанады. Ұл-қыздардың әкесі Рустамның айтуынша,   көп адам  бала асырап алу үшін қомақты ақша керек деп ойлайды.  «Біз үшін10 үлкен мәселе болса, қаражаттың жетіспеушілігі 8 -ші орында. Жәрдемақыға қол жеткізу мақсатында асырап алды дегендер де болды. Бастысы біз бақыттымыз. Мен қалай дұрыс тәрбие беремін деп жиі ойланамын. Оның оқуы, денсаулығы, қоғаммен байланысы көбірек толғандырады»,- дейді ол.   

Шүкіровтер шаңырағы «Мерейлі отбасы» ұлттық  байқауының облыстық кезеңінде бас жүлдеге ие болған.Енді олар Астанада өтетін республикалық жарысқа қатысады. 

Фото: Ашық дереккөз