Қояндыда су тасқыны кезінде жолды жауып тастағандар айыппұл арқалады
Ақмола облысында су тасқынынан кейін наразылық білдірген Қоянды ауылының тұрғындарына айыппұл салынды, деп хабарлайды Malim.kz.
Ауыл тұрғындары шенеуніктерден шара қолдануды талап етіп, тас жолды жауып тастаған еді. Кеше шеруге шыққандардың біразын полиция ұстағаны белгілі болды.
Ақмола облыстық сотының хабарлауынша, наразылыққа қатысқан алты адамға қатысты әкімшілік хаттама толтырылды. Оларға 110-нан 184 мың теңгеге дейін айыппұл төлеу міндеттелген.
Оқи отырыңыз: Жолды жауып тастаған Қоянды ауылынан бір түнде 80 мың текше метр су тартылды
2024 жылғы 26 наурызда Қоянды ауылында азаматтар әкімдіктің хабарламасынсыз және рұқсатынсыз ұйымдасқан митингіге қатысып, заң талаптарын бұзған. Олар 488-баптың 7-бөлігі бойынша әкімшілік жауапкершілікке тартылды. Сот қаулыларымен әрбір құқық бұзушыға 30-дан 50 АЕК мөлшерінде әкімшілік айыппұл салынды. Әйелдерге кәмелетке толмаған балаларының бары ескеріліп, айыппұл мөлшері 30%-ға азайтылды, - деп хабарлады Ақмола облыстық сотының баспасөз қызметі.
Бұл ретте сот екі әкімге – Ақмола облысы мен Целиноград облысының әкіміне су тасқыны аймақтарында қауіпсіздікті қамтамасыз етудегі нашар жұмысы үшін Қоянды әкіміне шара қолдану туралы жеке қаулы шығарды.
Еске салайық, Ақмола облысы Қоянды ауылында су тасқыны салдарынан тұрғын үйлер мен әлеуметтік мекемелер зардап шеккен. Жергілікті биліктің дым істемей отырғанын айыптаған халық Астана – Павлодар республикалық тас жолын жауып тастады.
Фото: ТЖМ
