«Ресми органдардың мәліметі қандай?». Журналист 20 жыл құлдықта болған отбасы туралы мәселе көтерді
Ол мән-жайды өзі анықтайтынын алға тартты.
Отандық журналист Гүлмира Әбіқай 20 жыл бойы құлдықта болған отбасы туралы айтты, деп хабарлайды Malim.kz.
Әбіқай бұл отбасының тағдыры неліктен осы күнге дейін белгісіз болып келгенін түсінбейтінін алға тартты.
20 жыл құлдықта жүрген отбасы туралы ақпарат тез тарады. Қоғам дүр сілкінді, өзіміз Алматыда отырып жаға ұстадық. Оқиға Қызылорда облысы, Қазалы ауданының шалғайда жатқан Жұбан атты малшы ауылында болған.
Көкейде сұрақ көп: сонда 20 жыл бойы бұл отбасын ешкім көріп-білмеген бе? Үш бала қайда туды, қалай өсті, мектепке барған ба? Отбасы ауырмай ма, науқастанған жағдайда дәрігер шақырған жоқ па? 20 жыл бойы өз туысын жасырын ұстап келген кәсіпкер кім? Шындығында, туыс па?
Басында қылмыстық іс қозғалды деді, іле-шала нағашы-жиен мәмілеге келді, 20 жылғы еңбегін өтейтін болыпты деген хабар тарады. Әйтеуір, ақпарат беті гу-гу, ду-ду.
Бұл отбасы қазір қайда? Шындығында, не болып жатыр? Оқырманым арасында Қожагелді бауырымыздың отбасын танитын, білетіндер бар ма? Ел не дейді, ол бір бөлек, ресми органдардың мәліметі қандай?
Ақыр Қызылордаға келген соң дәл қазір анықтаймын, деп жазды журналист.
Фото: Видеодан алынған кадр
MalimBlocks
