2025 жылғы 23 мамырда Алматыда Шерзат Болаттың өліміне байланысты іс бойынша сот отырысында тәуелсіз сот-медициналық сарапшы Тахир Халимназаров куәлік берді. Ол бұған дейін Қуандық Бишімбаевтың сотында танылған еді, деп хабарлайды Malim.kz Zakon.kz сайтына сілтеме жасап.
Сарапшы жәбірленуші тараптың адвокаттарының өтініші бойынша қосымша тәуелсіз сарапшы ретінде жауапқа тартылды. Отырыста алдымен адвокат Мейірман Шекеев Халимназаров жасаған қорытындыны жария етті.
Құжатта Шерзат Полаттың кеудесіне түскен жарақат пен көп мөлшерде қан жоғалту салдарынан көз жұмғаны жазылған.
"Кеуде тұсындағы пышақ жарақаты өкпені зақымдап, ішкі қан кетуге әкелген. Бұл оның өліміне себеп болды, себебі ол көп қан жоғалтқан. Сараптама кезінде өкпеқап қуысында 1,5 литр қан табылды. Адам 500–600 миллилитр қан жоғалтқанда-ақ жағдайы күрт нашарлайды. Ал 1 литрден астам қан жоғалту – өмірге қауіп төндіреді. Егер оған 30 минут ішінде шұғыл медициналық көмек көрсетіліп, жедел ота жасалса – Шерзат Полатты құтқаруға болар еді. Ол ауруханаға клиникалық өлім жағдайында жеткізілген" – деп оқыды қорытындыны Мейірман Шекеев.
Сот барысында Тахир Халимназаров өз қорытындысына түсініктеме беріп, басқа жарақаттардың өмірге қауіпті болмағанын айтты. Оның сөзінше:
"Өкпе тыныс алу жолдарымен жалғасып жатқандықтан, Шерзат тыныс алғанда аузынан қан кеткен. Бұл сырттан емес, іштен кеткен қан. Оның денесінде 1,5 литр қан жиналған, бірақ ауруханаға дейін қанша жоғалтқаны белгісіз. Мұндай жағдайда адамды құтқару уақыты нақты анықталмайды – бәрі физиологияға байланысты. Егер 10 минут ішінде ауруханаға жеткізілгенде, аман алып қалуға болар еді. Ең бастысы – қан кетпей тұрып шұғыл көмек көрсету".
Сарапшының айтуынша, жаралардың салыну ретін нақты анықтау мүмкін болмаған, себебі олардың барлығы жаңа. Егер адам тірі болса және жаралар жазылып келе жатса, уақытын шамалап айтуға болар еді. Бірақ бұл жағдайда ол қаза тапқан.
Сот барысында айыпталушылардың бірінің адвокаты Шерзаттың қолындағы сызаттардың кастеттен болуы мүмкін бе деп сұрады. Халимназаров:
"Кастетпен әдетте жарақат салады. Ал адам өзіне ондай жараны салуы екіталай", – деп жауап берді.
Бұл іс қоғам назарын аударып отыр, ал келесі сот отырысы алдағы күндері жалғасады.
Фото: видеодан кадр
