Су тасқыны: Өңірлердегі балалар сауықтыру орталықтарына жіберіліп жатыр

Ел аумағында 20 мыңнан астам білім саласының қызметкері су тасқынына ұшыраған өңірлерде белсенді жұмыс істеп жатыр, деп хабарлайды Malim.kz.

Бұл туралы Оқу-ағарту министрлігінің ресми өкілі Мереке Амангелдіқызы мәлімдеді. 

Оқу-ағарту министрінің тапсырмасы бойынша 6 сәуірден бастап 11 балаларды сауықтыру орталықтарына зардап шеккен өңірлерден балаларды қабылдау басталды. Мұнда сауықтырумен қатар оқу процесі де ұйымдастырылады. Балаларды қабылдаудың алғашқы күнінде Ақмола облысындағы «Жас дәурен» балаларды сауықтыру орталығы 80-нен астам баланы қабылдады, - деді ведомствоның ресми өкілі ОКҚ алаңында өткен баспасөз мәслихатында.

Оның айтуынша, балаларды сауықтыру орталықтарына ұйымдасқан әрі қауіпсіз тасымалдаудың іс-қимыл алгоритмі әзірленді. 

Бүгінгі таңда 20 мыңнан астам білім саласының қызметкері волонтерлер қатарында су тасқынына қарсы іс-шараларға қатысуда. Оның ішінде 10 мыңнан астамы эвакуациялық пункттерде жұмыс істеп жатыр, - дейді ол. 

Еске салсақ, Су тасқынына қарсы іс-шараларды үйлестіру және су тасқыны кезеңінің зардаптарын жою жөніндегі республикалық штаб жұмысының аясында 88 білім беру ұйымы төртінші тоқсанды қашықтан оқыту форматында бастағанын жазған болатынбыз.

Фото: Gov.kz