11- қыркүйекте Түркістан халықаралық әуежайының ұшу-қону жолағында әуе кемелерінің бірінен техникалық ақау шықты. Кейін бұл ақпаратты ҚР ІІМ Көліктегі полиция департаменті растады. Ведомство мәліметінше, оқиғадан ешкім зардап шекпеген, деп Malim.kz тілшісі, Kozachkov offside telegram арнасына сілтеме қалдырып хабарлайды.
Әлеуметтік желіде тараған мәліметке сәйкес, ақау Ұлттық ұланға тиесілі әскери-транспорттық ұшақта болған. Әуе кемесі Түркістаннан Астанаға ұшуы тиіс болған. Бортта 6 экипаж мүшесі мен 59 әскери қызметкер болғаны айтылады.
Алдын ала мәлімет бойынша, ұшақ қозғалтқыштарының бірі істен шығуы мүмкін. Оқиға ұшу кезінде болған деген болжам бар. Соның салдарынан тежеу жүйесі іске қосылып, ұшақтың шассиі өртенгені хабарланды.
Өртті әуежайдың өртке қарсы қызметі жедел сөндірген. Тараған дерек бойынша, оған 13 қызметкер мен 3 арнайы техника жұмылдырылған. Төтенше жағдайлар министрлігінің қызметкерлерін шақыру қажет болмаған.
Экипаж бен әскери қызметкерлер ұшақтан өздігінен шыққан. Зардап шеккендер жоқ. Ал әуе кемесі ұшу-қону жолағында қалып қойғандықтан, бірнеше рейс кешігіп, ұшақты арнайы техниканың көмегімен алып кетуге тура келген. 11 қыркүйекте Түркістан әуежайындағы бірнеше рейстің кестесіне өзгеріс енгізілгені де хабарланды. (Kursiv Media Казахстан)
Әзірге ресми органдар ұшақтың нақты түрін де, ақаудың себебін де жариялаған жоқ. Көліктегі полиция департаменті тек әуе кемесінде техникалық ақау болғанын және зардап шеккендер жоқ екенін растады. (Новости Zakon.kz)
Әлеуметтік желідегі деректе сөз Ұлттық ұлан пайдаланатын қытайлық Y-8F-200WA әскери-транспорттық ұшағы туралы болуы мүмкін екені айтылады. Бұл модельді Shaanxi Aircraft Company шығарады және ол кеңестік Ан-12 ұшағы негізінде жасалған. Алайда Түркістандағы оқиғаға дәл осы үлгідегі ұшақтың қатысы бар екені ресми түрде расталған жоқ.
