Әнші Төреғали Төреәлі Threads желісінде әйел мен ер адамның қарым-қатынасы туралы кезекті жазбасын жариялады. Өнер иесі бұл жолы әйелді ақшаға толы чемоданға теңеген, деп хабарлайды Malim.kz.
Әлеуметтік желіде қысқа ойлары мен өлең жолдарын бөлісіп жүрген әнші парақшасына:
"Әйел деген – ақшаға толы чемодан сияқты: ұстап жүрейін десең, ауыр, тастап кетейін десең, қимайсың", – деп жазған.
Ұсынылған скриншотта бұл жазбаға 2,2 мыңға жуық ұнату белгісі басылып, 114 пікір қалдырылғаны көрінеді. Сондай-ақ жарияланымды бөлісу көрсеткіші 580-ге жеткен.
Төреғали осы жазбасының алдында да ер мен әйел арасындағы сезім туралы ойын жариялаған.
"Еркек көп әйелге ұнауы мүмкін, бірақ бір әйелдің жүрегінен орын алуы – басқа мәртебе", – деген өнер иесі.
Скриншот түсірілген сәтте бұл жарияланым 6,3 мыңға жуық ұнату белгісін жинаған. Оған 265 пікір қалдырылған.
Екі жазбада да нақты адамның есімі аталмаған. Әнші сөзінің кімге арналғанын немесе қандай жағдайға байланысты айтылғанын түсіндірмеген.
Бұған дейін де жазбалары талқыланған
Бұған дейін Malim.kz Төреғали Төреәлінің "Әйел шешінбей, мәселе шешілмейді" деген жазбасы туралы жазған еді. Сол кезде әншінің сөзіне оқырмандар әртүрлі пікір білдірген. Пікір қалдырғандардың арасында Роза Аширбаева да болған. Ол "Телефонын алып қою керек" деп жазған.
Кейін өнер иесінің төсек пен бесік туралы жарияланымына да тоқталған едік. "Әуелі төсек тербеледі, сосын бесік тербеледі" деген сөзіне де көптеген пікір қалдырылған.
Алайда Төреғалидің соңғы уақытта неліктен мұндай жазбалар жариялап жүргені белгісіз. Ұсынылған жазбаларда олардың астарына қатысты түсініктеме жоқ. Сондықтан бұл сөздердің жеке өміріндегі жағдайға қатысы бар-жоғы да анық емес.
Төреғали Төреәлі кім?
Төреғали Төреәлі – қазақстандық әнші, айтыскер ақын әрі актер. Толық аты-жөні – Төреғали Төреәліұлы Әлиханов. Ол 1992 жылғы 14 қазанда Байқоңыр қаласында дүниеге келген. Көпшілікке "Ұлы дала баласы" деген атпен танымал.
Өнер иесі Алматыдағы Темірбек Жүргенов атындағы өнер академиясының колледжінде актер мамандығы бойынша білім алған. Шығармашылық жолының алғашқы кезеңінде айтысқа қатысып, бірнеше студенттік сайыста жеңімпаз, республикалық айтыстарда жүлдегер атанған. Кейін әншілікке бет бұрған. Оның көпшілікке танылуына ықпал еткен туындыларының бірі – "Отанды сүю – иманнан" әні.
Төреғалидің Ерке Есмаханмен бірге орындаған "Алло" әні де тыңдарман арасында кең тараған. Репертуарында "Бір түрлі қыз", "Ана", "Бол жанымда" секілді әндер бар. Шығармашылығында махаббат, отбасы, туған жер мен ата-ана тақырыптары қамтылады.
Әнші кино саласында да бағын сынаған. 2018 жылы жарыққа шыққан "Ұлы дала комедиясы" фильмінде басты рөлді сомдады. Дархан Сәркенов түсірген туындыда танымал әншінің тосын жағдайдан кейін өзге адамның өмірін сүруі баяндалады.
Төреғалидің жұбайы – Толқын Тұрарбекқызы. Өнер иесі әлеуметтік желіде шығармашылық жаңалықтарымен қатар, отбасымен өткізген сәттерін де бөлісіп тұрады. Оның парақшасында концерттік бейнежазбалар, өлеңдер және түрлі тақырыптағы қысқа ойлар жарияланады.
