Ғарышта істен шықты деп есептелген LES-1 жерсерігінен 45 жылдан кейін қайта сигнал тіркелген. 1967 жылы таратқышы сөнген аппараттың радиосигналын әуесқой радиобақылаушылар 2012 жылы анықтаған. Бұл ерекше оқиға туралы Массачусетс технологиялық институтының Линкольн зертханасы баяндады, деп хабарлайды Malim.kz.
Ғарышқа 1965 жылы ұшырылған
LES-1 – Линкольн зертханасы жасаған тәжірибелік байланыс жерсерігі. Ол 1965 жылдың ақпанында орбитаға шығарылған. Аппарат ұзақ қашықтықтағы сенімді байланыс технологияларын сынауға арналған.
Екі жылдық жұмыстан кейін, 1967 жылы оның таратқышы сөнген. Содан кейін жерсерік ондаған жыл бойы үнсіз қалғанымен, Жерді айналуын жалғастырған.
Күтпеген сигналды кім байқаған?
2012 жылы әуесқой радиобақылаушылар LES-1 аппаратынан 237 мегагерц жиіліктегі сигналды анықтаған. Осылайша, әлдеқашан жұмысын тоқтатты деп саналған жерсерік қайтадан назарға іліккен.
Оқиғаның ерекшелігі – аппаратқа ғарышта ешкім жөндеу жүргізбеген. Оның таратқышы ұзақ үзілістен кейін өздігінен қайта іске қосылған.
Жерсерік қалай "тірілген"?
Мұның нақты себебі анықталған жоқ. Ғалымдардың болжамынша, уақыт өте келе батареялар немесе электр тізбектері тозып, қысқа тұйықталу пайда болуы мүмкін.
Соның нәтижесінде күн батареялары өндірген қуат таратқышқа тікелей жеткен болуы ықтимал. Алайда зертхана бұл түсіндірмені дәлелденген қорытынды ретінде ұсынбайды.
Күн сәулесі түскенде ғана сигнал береді
Зертхана мәліметінше, LES-1 Жерді шамамен 2,6 сағатта бір айналып шығады. Оның күн панельдеріне жарық түскенде электр қуаты өндіріліп, аппарат сигнал таратады. Ал Жердің көлеңкесіне кіргенде сигнал тоқтайды.
Мамандар жерсерік зертхана орналасқан аймақтың үстінен өткен сайын сигналын жазатын автоматты антенна жүйесін де әзірлеген. Осылайша, жарты ғасырға жуық үнсіз қалған аппарат ғылыми бақылау нысанына қайта айналған.
