Су тасқыны: ТЖМ өңірлердегі ахуал жайлы ақпаратты жаңартты

ТЖМ мәліметтері бойынша, апаттық-құтқару және су тасқынына қарсы жұмыстарға 14 мыңнан астам адам жұмылдырылған, деп хабарлайды Malim.kz.

Төтенше жағдайлар министрлігінде су тасқынына байланысты Қазақстан өңірлеріндегі қазіргі жағдай туралы айтылды.

Шығыс Қазақстан облысы

Шығыс Қазақстан облысының Алтай ауданындағы су тасқыны жағдайы тұрақталған.

Барлығы 370 дана қап төселген. 1335 тонна инертті материалдар салынып, мотопомпалардың көмегімен 27 800 текше метр су сорылған. Жалпы, облыс бойынша өзендер сыни белгілердің деңгейінен аспайды, - хабарлады ТЖМ.

Атырау облысы

Атырау облысында жағалауды нығайту жұмыстары жалғасып жатыр.

Соңғы 5 күнде Құлсарыға 176 үйден су тартылып, айдалды. Қалған су басқан 180 үйді мотопомпалар мен қуатты жылжымалы сорғы станцияларын қолдана отырып, тәулік бойы айдау жұмыстары жүргізілуде, - делінген хабарламада.

Солтүстік Қазақстан облысы

Солтүстік Қазақстан облысының Петропавл және Қызылжар аудандарында су басқан аумақтардан су айдау жалғасуда.

Республика бойынша 8 378 тұрғын үй мен 2 994 аула аумағынан су бұрылып, сорылды. 48 750 адам үйлеріне оралды.

Авариялық-құтқару және су тасқынына қарсы жұмыстарға барлығы 14 251 адам мен 1 428 бірлік техника, 239 су айдау құралы мен 75 жүзу құралы, 4 әуе кемесі жұмылдырылды, - деп хабарлады ТЖМ.

Фото: ТЖМ