Тимур Сүлейменов: Көше бойындағы валюта бағамдарының таблолары 90-жылдардан қалған дәстүр
Ұлттық банк төрағасы Тимур Сүлейменов көше бойына орнатылған валюта бағамдарын көрсететін таблолардан бас тартуды ұсынды, деп хабарлайды Malim.kz.
«90-жылдары көптеген адамдар алып-сатарлықпен айналысты. Ақша ауыстырып, Қытайға немесе басқа жаққа бару керек болды. Сол кезде доллар кеңінен қолданылды, ұлттық валютаның күрт құнсыздануы мен инфляцияның жоғары болуына байланысты долларлану өте жоғары болды. Ол кезде адамдарға күнделікті валюта бағамын білу қажеттігі туындады. Қазір ондай жағдай жоқ», – деді ол.
Оның айтуынша, мемлекет, бизнес пен қоғам бірлесіп долларсыздандыру бағытында үлкен жұмыс атқарған.
«Біз депозиттерді долларсыздандыра алдық. Мысалы, 7-8 жыл бұрын депозиттердің 70%-ы доллармен сақталса, қазір бұл көрсеткіш 22%-ды ғана құрайды. Барлық маркетплейстер, жарнамалар, бағалар – барлығы теңгемен көрсетіледі», – деді ол.
Тимур Сүлейменов валюта таблоларын көшеде іліп қоюдың қазіргі уақытта маңыздылығы жоқ екенін былай түсіндірді:
«Онда барлық дүкендер сүт – 450, нан – 150, картоп – 300 деген сияқты бағалар жазылған табло іліп қойсын. Бұлар да күнделікті тұтынатын тауарлар ғой. Мен де, мысалы, картопты қай жерде 300-ге, қай жерде 350 немесе 280-ге алуға болатынын білгім келеді. Бірақ ешкім бұлай істемейді».
Сөзінің соңында ол бүгінде адамдар көше аралап, табло іздеп жүрмейтінін, бәрі де банк қосымшалары арқылы бағамды смартфоннан қарайтынын атап өтті.
Фото: Malim.kz
Самое читаемое
