Украинадағы соғысқа қатысқан қазақстандықтар тізімі: ІІМ пікір білдірді

Украина мәліметінше, Ресей жағында 600-ден астам Қазақстан азаматы соғысып жүр. ҚР Ішкі істер министрлігі бұл деректердің дәлдігін растаған жоқ, - деп хабарлайды Malim.kz тілшісі Orda.kz-ке сілтеме жасап. 

ІІМ орынбасары Игор Лепеха жалдамалы әскер болу заңмен тыйым салынғанын еске салды. Мұндай қылмыс үшін қылмыстық жауапкершілік қарастырылған.

"Біріншіден, біз деректердің дұрыстығын білмейміз. Олар қаншалық рас екенін білмейміз. Ақпарат бар-жоғын қарау керек, тексеру қажет", — деді ол мәжіліс кулуарында журналистердің сұрақтарына жауап беріп.

Бұған дейін Украина Қорғаныс министрлігі мен Украина Ұлттық барлау басқармасы қарамағындағы «Хочу жить» орталығы 2022 жылдан бастап Украина аумағында әскери әрекеттерге қатысқан 661 Қазақстан азаматы туралы мәлімет жариялады. Олардың ақпараттарына сәйкес, кем дегенде 78 адам қаза тапқан. Ақпарат көзі ретінде Ресей әскерінің анонимді өкілдері аталған.

«Хочу жить» орталығы соғыс басталған кезде құрылып, Ресей әскери қызметкерлерінің тұтқынға берілу туралы өтініштерін қабылдаумен айналысады.

Фото: pixabay.com