Төтенше жағдай кезінде табысынан айрылған елге бөлінген 42 500 теңгенің жыры бітер емес. Үкімет «бұл ақшаны заңсыз алғандарды жазалаймыз» деп кіжінгені есте. Енді бүгін еңбек және халықты әлеуметтік қорғау министрі Біржан НҰРЫМБЕТОВ «ешкім де қылмыстық жауапкершілікке тартылмайды» деп мәлімдеме жасады.
Осындайда Асқар МАМИН үкіметі Жапон Үкіметінен үлгі алса дейсің.
Жапонияның премьер-министрі Синдзо АБЭ айлығының 30 пайызы мен сыйақысын бюджетке қайтарпы берген. Ал қалған министрлер еңбекақыларының 20 пайызынан бас тартқан. Үкімет мүшелері халық коронавирустан табыссыз қалып жатқанда жалақыларының бір бөлігін мұқтаж жандарға аудармақ.
Синдзо Абэ ай сайын 3,3 млн иен алады (шамамен 30,5 мың АҚШ доллары). Премьер-министр 9,3 мың АҚШ долларын ел қазынасына аударып отыр. Жапонияның қатардағы министрі ай сайын 22,7 мың АҚШ долларын алады.
polit.ru сайтының жазуынша, күн шығыс елінің депутаттары да бұндай ізгі істен сырт қалмаған. 14 сәуір күні билік және оппозициялық партияның депутаттары қос палата депутаттарының айлығын 20 пайызға қысқарту туралы байламға келген. Осыған орай заң жобасы қабылданып, депутаттар бір жыл бойы жалақыларының 20 пайызын әлеуметтік салаға аудармақшы.
2011 жылы Жапонияның солтүстік-шығысындағы Хонсю аралында цунамиден «Фукусима-1» АЭС-да авария болған-ды. Сол кезде де үкімет мүшелері айлықтарының бір бөлігін халыққа берген.
Жапонияда 9,4 мың адам коронавирусты жұқтырып, 190 адам көз жұмды. 170 адам ауыр жағдайда.
Коллаж: malim.kz
Байланысты жаналықтар
MalimBlocks
