Маңғыстауда ауыл шаруашылығы басқармасы басшысының орынбасары сотталды
Пара алу фактісі бойынша кінәлі деп танылған
Маңғыстау облысы Ауыл шаруашылығы басқармасы басшысының бұрынғы орынбасары пара алғаны үшін сотталды. Сыбайлас жемқорлыққа қарсы іс-қимыл агенттігінің осындай мәлімет таратты.
Ауыл шаруашылығы басқармасы басшысының бұрынғы орынбасары Бақтыбай Ізімтаев күн панельдерін жеткізушілерден субсидия беру кезінде жалпы қамқорлығы үшін пара алу фактісі бойынша кінәлі деп танылған. оған 28 миллион теңге мөлшерінде айыппұл салынды. Биыл 30 мамырда Ақтау қалалық соты үкім шығарған.
Шенеунік мемлекеттік органдарда қызмет атқару құқығынан өмір бойына айырылды. Сондай-ақ, күн панельдерін жеткізушілер Шынболат Құмар, Жақсылық Аралбаев пара бергені үшін сотталды. Әрқайсысына 2,6 миллион теңге көлемінде айыппұл салынды.
Сонымен қатар, сот «Байсырымов» ЖК иесін жалған құжаттарды ұсыну арқылы субсидия сомасын алған алаяқтық дерегі бойынша кінәлі деп танып, 3 жылға бас бостандығынан айырды. Сотталғандардың қылмыстық іс-әрекеті нәтижесінде мемлекетке 6,9 млн теңге мөлшерінде залал келтірілді.
