Қаңтар оқиғасы. Терроризмге қатысты 8 қылмыстық іс тергеліп жатыр
Тәртіпсіздіктерге қатысуға көндірген және тонау әрекетін жасаған
Қаңтардағы жаппай тәртіпсіздіктер бойынша 58 және терроризм актілеріне қатысты 8 қылмыстық іс бар. Бұл жөнінде ҚР Бас прокуратурасының өкілі Елдос Қилымжанов айтты.
«Қиратулар, мемлекеттік объектілерді өртеу, мүліктерді жою және терроризм актілері Алматы, Шымкент қалаларында, Ақтөбе, Атырау, Алматы, Жамбыл, Қызылорда және Шығыс Қазақстан облыстарында жасалғаны белгілі. Сол қайғылы күндері қылмыскерлер әскерилерге шабуыл жасап, жолдың жүру бөлігін жауып, автокөліктерді өртеп, азаматтарды тәртіпсіздіктерге қатысуға көндірген және тонау әрекетін жасаған», - деді ол Орталық коммуникациялар қызметіндегі брифингте.
Оның айтуынша, қоғамдық қауіпсіздік пен құқықтық тәртіпті қамтамасыз етуді бұғаттау үшін олар полиция органдарының ғимараттарына шабуыл жасады. «Бүгінгі күні арнайы прокурорлардың іс жүргізуінде жаппай тәртіпсіздіктер бойынша 58 және терроризм актілерімен 8 қылмыстық іс бар. Аяқталуына қарай істер сотқа жолдануда», - деді Қилымжанов.
