Қазақ боксшысы Сириядағы қыздарын қайтаруға Ердоғаннан көмек сұрады
Екі қызын ажырасқан әйелі Сирияға алып кеткен
Боксшы Руслан Мырсатаевтың екі қызын ажырасқан әйелі Сирияға алып кеткен. Ол балаларын қайтару үшін Түркия президенті Ердоғаннан көмек сұрады.
Әлеуметтік желіде жарияланған бейнежазбада спортшы қос қызының өміріне алаңдап, Сирияда олардың жағдайының нашар екенін айтты.
«Түрік елінің президенті Реджеп Тайп Ердоған мырза! Сізден менің екі қызымды елімізге қайтаруға көмектесуіңізді сұраймын. Қыздарымды анасы Жаңыл Сейдахметова 2015 жылы мамыр айында анамды алдап, Сирияға алып кеткен. Сол кездері қыздарым Бішкек қаласында анамның қолында тұратын. Шешем оларды қатты жақсы көрді. Немерелерін сағынып, 2019 жылы қайғыдан қайтыс болды. Өле өлгенше соларды көрсем деп армандап кетті. Жаңыл Сейдахметова менің бұрынғы әйелім еді. Қыздарым Дариға мен Ралия Руслан қызы 2015 жылы бес және жеті жаста болған. Осы қыздарымды Сириядан елге қайтаруды сұраймын. Себебі, олардың жағдайы өте қиын", — деді боксшы Руслан Мырсатаев.
Белгілі боксшы неліктен Түркия президентінен көмек сұрауының себебін айтпады. Әзірге қыздарының мәселесі қалай шешілері белгісіз.
Руслан Мырсатаев бірнеше жыл Қазақстан құрамасы сапында болды. Кейін "Астана арландары" жартылай кәсіпқой бокс командасымен әлем чемпионы атанған. 2008 жылы Бейжің Олимпиадасына қатысып, іріктеу кезеңдерінде Қытай боксшысынан ұтылған. Сонымен бірге, ол 2005 жылы қырғыз елінің атынан әлем чемпионатына қатысты.
