Қасым-Жомарт Тоқаев Тілеухан Қабдрахмановті марапаттады, - деп хабарлайды Malim.kz тілшісі.
Мемлекет басшысының Жарлығымен Қазақстан Республикасының сыртқы саясатын жүзеге асыруға, шет мемлекеттермен достық қарым-қатынастардың орнатылуы мен дамуына қосқан елеулі үлесі үшін мемлекет қайраткері, дипломатиялық қызмет ардагері Тілеухан Қабдрахманов І дәрежелі "Достық" орденімен наградталды.
Тілеухан Қабдрахманов туралы не белгілі?
Тлеухан Қабдрахманов 1945 жылғы 29 сәуірде Семей облысы Жаңасемей ауданының Тереңқұдық ауылында дүниеге келген. 1973 жылы Мәскеудегі Патрис Лумумба атындағы Халықтар достығы университетінің экономика және құқық факультетін "халық шаруашылығын жоспарлау және экономика" мамандығы бойынша тәмамдады. 1991 жылы КСРО Министрлер Кеңесі жанындағы Халық шаруашылығы академиясын бітірді.
Еңбек жолын 1963 жылы бастаған. 1973–1991 жылдар аралығында Қазақ КСР Мемжоспарында және Мемлекеттік экономика комитетінде басшылық қызметтер атқарды.
1991–1993 жылдары – Қазақстан Республикасы Экономика жөніндегі мемлекеттік комитетінің төрағасы, Үкімет мүшесі болды.
1993 жылдан 2008 жылға дейін Қазақстанның Франция, Жапония, Өзбекстан, Литва, Латвия, Эстония және Финляндиядағы Төтенше және Өкілетті Елшісі қызметтерін атқарып, ЮНЕСКО жанындағы тұрақты өкіл болды.
Еңбегі мемлекет тарапынан жоғары бағаланып, "Құрмет" орденімен, "Астана" медалімен және өзге де мемлекеттік, мерейтойлық марапаттармен наградталған. "Қазақстан Республикасының дипломатиялық қызметінің еңбек сіңірген қызметкері", "Қазақстанның еңбек сіңірген қайраткері" құрметті атақтарының иегері.
Фото: kazpravda.kz
