Жапония қазақстандық компанияға санкция салды
Сауда және интеграция министрлігі бұл жайында ертерек хабардар болған
Жапония үкіметі 10 қаңтарда Украинадағы жағдайға байланысты санкцияларды кеңейтті. Zakon.kz жазуынша, санкциялар Ресейге және басқа елдердегі компанияларға 335 түрлі өнімнің экспортын тоқтатады, деп хабарлайды Malim.kz.
Олардың арасында арнайы көлік құралдарының, мысалы, крандар мен мотоциклдер үшін қозғалтқыш бөлшектері, сондай-ақ Ресейдің өнеркәсіптік қуатын арттыруға көмектесетін тауарлар бар. Эмбаргоға химиялық заттар да кіреді, олардың ішінде химиялық қару жасауға қатысы бар капсаицин де бар.
Жапонияның Экономика, сауда және өнеркәсіп министрлігінің мәліметтері бойынша, санкциялар 23 қаңтардан бастап күшіне енеді. Олар Ресейдің 11 жеке тұлғасы мен 29 ұйымының, соның ішінде 3 банкінің (ЦМРБанк, РФК Банк және Тимер Банк) активтерін бұғаттауды қамтиды. Сондай-ақ, санкциялар Солтүстік Кореяның бір азаматы мен Грузияның MRB Bank банкін де қосқан.
Экспортқа тыйым салынған ұйымдар тізіміне Ресейдің 22 ұйымы мен санкцияларды айналып өтуге көмектесті деп күдікке ілінген 31 ұйым енгізілген. Бұл тізімге Біріккен Араб Әмірліктерінен (1), Қытайдан (18), Қазақстаннан (1), Қырғызстаннан (2) және Түркиядан (8) компаниялар кіреді. Бұл шаралар 17 қаңтардан бастап енгізіледі.
Жапонияның Сыртқы істер министрлігінің мәліметіне сәйкес, Қазақстаннан санкцияға ұшыраған компания – Астанада орналасқан Da Group 22. Ашық ақпарат көздерінен мәлім болғаны, Da Group 22 2022 жылы құрылған, ол электронды және телекоммуникациялық жабдықтар мен олардың бөлшектерін көтерме саудалаумен айналысады. Бұл компания бұрын Еуропа Одағынан және АҚШ-тан санкциялық тізімдерге енгізілген болатын. Еліміздің Сауда және интеграция министрлігі бұл компанияға қатысты батыс елдерінің әрекеттері туралы алдын ала хабардар болғанын және санкциялар бойынша сыртқы серіктестермен диалог аясында бұл туралы мәлімдегенін хабарлады.
Фото: коллаж Malim.kz
