Ресей мемлекеттік думасының депутаты Владимир Жириновский кезекті рет Қазақстанаға қатысты мәлімдеме жасады. Бұл жолы ол Қазақстанда тұратын орыстарды Ресейге тез арада көшіру керектігін айтты. Оның сөзінше, Орталық Азия мен Қазақстандағы жағдай ушығуы мүмкін.
«Орталық Азияда жағдай ушығып, қақтығыстар да болуы мүмкін. Мен өзім сол жақтанмын. Жерлестеріме кеңес бергім келеді. Қақтығысты күтіп отырудың қажеті жоқ. Ресейге көшіңіздер. Біз ішкі істер министрлігіне хат жолдадық. Орталық Азия мен Қазақстандағы орыстарға Ресей паспортын беруді тездету қажет. Екі жыл емес, бір айдың ішінде беру керек. Сыртқы істер министрлігі де Орталық Азия мен Қазақстандағы консулдықтарға тапсырма беріп, жұмыс қарқынын арттыруы қажет», - деді Жириновский.
Бұл ЛДПР партиясының көшбасшысы Владимир Жириновскийдің Қазақстанға қатысты айтқан алғашқы даулы мәлімдемесі емес. Ол бұған «Қазақстанның солтүстігі Ресейдің жері», «Қазақстан Ресейдің бір губерниясы болуы тиіс» деген сарындағы бірнеше мәлімдеме жасаған. Осыған байланысты Қазақстан СІМ Ресейге қарсылық нотасын да жіберген.
MalimBlocks
