3 қарашада Алматыдағы Республика сарайында өткен "Қазақ аруы – 2026" ұлттық сұлулық байқауында 20 жастағы Асылым Өтепберген жеңімпаз атанды. Алайда әлеуметтік желіде жаңа арудың жеңісімен бірге қатысушыларға қойылған сұрақтар да қызу талқыланып жатыр. Бір бойжеткен Таяу Шығыстағы қақтығыс туралы сауалға тосылса, екіншісі Баян Алагөзованы бұрынғы тегімен атаған. Malim.kz тілшісі биылғы байқаудың қорытындысын, жұрт назарын аударған сәттерін және соңғы үш жылдағы жеңімпаздар туралы деректерді жинақтады.
"Қазақ аруы – 2026" кім атанды?
Биыл ұлттық байқаудың финалына Қазақстанның әр өңірінен 22 бойжеткен қатысты. Жобаны Баян Алагөзоваға тиесілі BM Production продюсерлік орталығы ұйымдастырды. Жеңімпаз көрермендердің дауыс беруі арқылы анықталды.
Қорытындысында Алматының атынан қатысқан Асылым Өтепберген 17 164 дауыс жинап, бас жүлдеге ие болды. Екінші орынды 10 480 дауыс алған қостанайлық Әйгерім Қайпен иеленді. Ал 4 499 көрермен қолдаған шымкенттік Сымбат Әбубәкір үздік үштікті түйіндеді. Асылымға Аида Кауменованың сән үйі әзірлеген арнайы шапан және шетелге саяхат жолдамасы табысталды.
Асылым Өтепберген – әл-Фараби атындағы Қазақ ұлттық университетінің студенті. Оқуымен қатар әлеуметтік желіде блог жүргізеді. Осылайша, биылғы тәж студент әрі контент жасаумен айналысатын бойжеткенге бұйырды.
"Қыз Жібек" бейнесіндегі 22 ару
Биылғы кештің көркемдік өзегіне "Қыз Жібек" жыры алынған. Сахна шымылдығы "Гәкку" әнімен ашылып, қатысушылар Жібек бейнесінде көрінді. Ұлттық киім, музыка және сахналық қойылым арқылы ұйымдастырушылар байқаудың мәдени мазмұнын көрсетуге тырысқан.
Қатысушылар "Қыз Жібек" қойылымында бірге өнер көрсеткен. Кештегі дефиле кезеңінде былтырғы жеңімпаз Дәрия Қуатжанның сән үйі әзірлеген көйлектер де таныстырылған. Бұл – өткен жылғы арудың жоба сахнасына өз кәсібінің нәтижесімен қайта оралғанының бір мысалы.
Таяу Шығыс туралы сұрақ неге талқыға түсті?
Кештен кейін ең көп тараған үзінділердің бірі сұрақ-жауап кезеңіне қатысты болды. Жүргізуші Аша Матай қатысушылардың біріне Таяу Шығыстағы толастамай жатқан қақтығыс туралы сұрақ қойған. Бойжеткен сауалдың мәнін толық түсінбегенін айтып, тосылып қалған. Осы сәт түсірілген видео әлеуметтік желіде талқыланды.
Бұл сұрақтың Мереке Жарқынбек есімді қатысушыға қойылған. Кей қолданушылар Таяу Шығыс туралы сұрақтың дұрыс құрастырылмағанына назар аударған.
Баян Алагөзованы бұрынғы тегімен атаған
Желіде тараған тағы бір үзінді Айжан Әбілданың жауабына қатысты болды. Актриса Меруерт Өтекешова оған кез келген адаммен кездесу мүмкіндігі берілсе, кімді таңдайтынын сұраған.
Қатысушы Меруерт Өтекешова мен Баян Мақсатқызын атап, олардың өмір жолынан өзіне қажет кеңес алғысы келетінін жеткізген. Бірақ продюсерді бұрынғы тегімен – Баян Есентаева деп атаған. Әлеуметтік желіде осы тұсқа назар аударып, сын жазғандар болған.
Осы екі эпизодтың кең тарауы байқаудағы сұрақ-жауап кезеңінің көрермен үшін қаншалықты маңызды екенін көрсетті. Ұлттық киім мен сахналық дайындықтан бөлек, қатысушылардың ойын жеткізуі де қоғамдық талқының өзегіне айналды.
"Қазақ аруы" жобасын кім ойлап тапқан?
"Қазақ аруы" жобасының негізін қалаушы әрі идеялық жетекшісі – продюсер Баян Алагөзова. Байқау 2011 жылдан бері ұйымдастырылып келеді.
BAQ.KZ жариялаған ресми парақша мәліметінде жобаның мақсаты ұлттық мәдениет пен заманауи қазақ қызының бейнесін ұштастыру ретінде сипатталған. Мұнда қазақ тіліне, дәстүрге, білімге және қатысушының тұлғалық қасиеттеріне мән беріледі.
Жеңімпазды анықтау тәсілі де уақыт өте өзгерген. 2024 жылы бас жүлде иесін көрермендер дауыс беру арқылы таңдады. Бұған дейін бұл шешімді қазылар алқасы қабылдайтын. Осылайша, кейінгі маусымдарда көрермен қолдауы байқаудың шешуші тетігіне айналды.
2024 жыл: Ақкербез Ысқаққызы
2024 жылы "Қазақ аруы" атағын Қызылорда облысының тумасы, сол кезде 17 жаста болған Ақкербез Ысқаққызы жеңіп алды. Ол республикалық кезеңге дейін "Сыр аруы – 2024" өңірлік байқауында топ жарған.
Ақкербездің жеңісі дауыс беру жүйесіне қатысты талқылаумен қатар жүрді. Кейін қайта дауыс беру өткізіліп, оның қорытындысында да Ақкербез бірінші орнын сақтап қалған. Бұл оқиға көрермен дауысына негізделген байқауда техникалық жүйе мен нәтижеге деген сенімнің маңызын көрсетті.
Ақкербез туралы таныстырылым материалдарында оның әл-Фараби атындағы Қазақ ұлттық университетіне халықаралық қатынастар мамандығы бойынша оқуға түскені жазылған. Ал 2026 жылы ол еркін күрес балуаны Әкежан Айтбековке тұрмысқа шықты.
Бұған дейін Malim.kz оның қыз ұзату рәсімі мен үйлену тойы туралы жазған еді. Ақкербезді әнші Гүлнұр Оразымбетова ұзатқан. Әнші ару байқауда жеңген кезде оны өзі ұзатуға уәде бергенін жеткізген.
2025 жыл: Дәрия Қуатжан
2025 жылғы байқауда Талдықорған атынан қатысқан Дәрия Қуатжан жеңіске жетті. Ол 26 376 көрерменнің дауысын жинады. Екінші орын алған Диана Қырымға 13 160 адам қолдау білдірген.
Дәрия байқауға дейін-ақ тігін және киім дизайны саласында жұмыс істеген. ОЛ бала кезінен киім тігуге қызығып, кейін Darideiya сән үйін ашқан. Ұлттық нақышты заманауи киіммен үйлестіру оның кәсібінің негізгі бағыттарының біріне айналған.
Байқауда Дәрия балаларға арналған "Көшпенді дала ұрпақтары" атты авторлық киім топтамасын таныстырған. Демек, ол сахнаға өз қолынан шыққан шығармашылық жұмысымен келген.
Ал биылғы "Қазақ аруы – 2026" кешінде оның сән үйінің көйлектері көрсетілді. Бұл дерек Дәрияның байқаудан кейін де сән саласындағы жұмысын жалғастырып жүргенін аңғартады. Дегенмен оның кәсібі тәж кигеннен кейін ғана басталған деу дұрыс болмас еді: дизайнерлік жұмысы жеңіске дейін қалыптасқан.
2026 жыл: Асылым Өтепберген
Биылғы жеңімпаз Асылым Өтепберген 2006 жылы Алматыда дүниеге келген. Ол төрт тіл меңгерген, бала кезінен өнерге қызыққан және "Айгөлек" бағдарламасына қатысқан. Алты жыл бойы сахнада өнер көрсеткені де айтылады.
Асылым тігін тігуді ұнатады. Бала күнінен қалыптасқан қызығушылығын кейін арнайы курстарда дамытқан. Сондай-ақ шахмат ойнағанды жақсы көреді.
Қазір оның көпшілікке белгілі негізгі бағыттары – университеттегі оқу, әлеуметтік желідегі блогы және шығармашылық қызығушылықтары. Асылым тәжді кеше ғана иеленді. Сондықтан оның "Қазақ аруы" ретіндегі кейінгі еңбегін бағалау үшін уақыт қажет.
Тәжден кейінгі жол қандай?
Соңғы үш жылдағы жеңімпаздардың өмір жолы әртүрлі өрбіп келеді. Ақкербездің оқуына және отбасын құруына қатысты жаңалықтар жарияланса, Дәрия сән саласындағы кәсібімен көрініп жүр. Асылым үшін бұл кезең енді басталды.
Биылғы байқау төңірегіндегі талқылау жобаның келесі маусымдарына да қатысты сұрақ қалдырды: көрермен сахнадан қандай қазақ қызының бейнесін көргісі келеді және оны бағалаудың өлшемі қандай болуы керек? Ұйымдастырушылар жариялаған мақсат білімді, мәдениетін құрметтейтін, өз ойын жеткізе алатын қыздың бейнесін таныту болса, байқаудың тапсырмалары мен жеңімпаздардың кейінгі жұмысы да сол мақсаттың қалай орындалатынын көрсетеді.
