2026 жылы жаңа басқару командасы келгеннен кейін Қазақмыс кәсіпорындардағы әлеуметтік-тұрмыстық инфрақұрылымды жүйелі түрде жаңартуға кірісті. Бағдарлама өндірістік нысандар мен вахталық кенттерді қамтиды. Негізгі міндет - қызметкерлер күн сайын пайдаланатын нысандардағы жағдайды жақсарту: киім ауыстыратын, тұратын және тамақтанатын бөлмелерді жаңарту, деп хабарлайды Malim.kz.
Жыл басынан бері Жезқазған, Балқаш және Қарағанды өңірлеріндегі кәсіпорындарға жаңа жабдық мен қажетті мүлік жеткізілуде.
Жұмыстың негізгі бағыттарының бірі – киім ауыстыратын бөлмелерді жаңарту. Биыл қызметкерлердің жеке және арнайы киімдеріне арналған 6,9 мыңға жуық арнайы шкаф сатып алынып, орнатылды. Оның 4,5 мыңнан астамы Жезқазған өңіріндегі кәсіпорындарға, 1,6 мыңнан астамы Балқаш өңіріне, ал 700-ден астамы Қарағанды өңіріне жеткізілді. Жаңа шкафтар табиғи желдету жүйесімен жабдықталған және ұзақ уақыт пайдалануға арналған.
Вахталық кенттердегі жатын бөлмелер де жаңартылып жатыр. 2026 жылы шамамен 10 мың дана тоқыма өнімі мен төсек-орын жабдығын сатып алу жоспарланған. Бүгінде кәсіпорындарға 7,8 мыңға жуық өнім жеткізілді. Оның ішінде төсек-орын жабдықтары, ортопедиялық матрастар, жастықтар, көрпелер мен жапқыштар бар. Олар күнделікті пайдалануға және тұрақты санитарлық өңдеуге төзімді.
Жұмыскерлердің тамақтануына да ерекше көңіл бөлінуде. 1 қыркүйектен бастап Қарағанды және Балқаш өңірлеріндегі кәсіпорындарда тамақтануды ұйымдастырудың бірыңғай тәсілі енгізілді. Тағамның сапасы мен қауіпсіздігіне, ас мәзірін қалыптастыруға, тағам дайындау технологиясына және қызмет көрсету деңгейіне қойылатын ортақ талап белгіленді.
Тамақтану сапасын компанияның бейінді бөлімшелері бақылауда ұстайды. Асханалардың жұмысын бағалау кезінде қызметкерлердің пікірі мен кері байланысы ескеріледі.
Әлеуметтік-тұрмыстық инфрақұрылымды жаңарту - Қазақмыстың жаңа командасының жұмыскерлердің еңбек және тұрмыс жағдайын жақсартуға бағытталған негізгі жұмысының бірі. Компания кәсіпорындардағы тұрмыстық нысандарды кезең-кезеңімен жаңартып, жұмыскерлер күнделікті пайдаланатын нысандар мен қызмет сапасына ерекше назар аударуда.
