9 қыркүйекте Қазақстанның әр өңірінде ауа райы бір-бірінен айтарлықтай ерекшеленеді. Батыс, солтүстік-батыс және солтүстік аймақтарға салқын әрі ылғалды ауа массалары келсе, елдің оңтүстігі, оңтүстік-шығысы мен шығысында жаздағыдай ыстық сақталады, деп хабарлайды Malim.kz.
Болжам бойынша, Оралда күндіз ауа температурасы +15...+17 градус, Ақтөбеде +19...+21, Атырауда +20...+22 градус болады. Ал Тараз бен Түркістанда күндізгі температура +34...+36 градусқа дейін көтеріледі.
Астанада 9 қыркүйекте көшпелі бұлт шығып, жауын-шашын күтілмейді. Оңтүстік бағыттан секундына 9-14 метр жылдамдықпен жел соғады. Түнде +15...+17, күндіз +31...+33 градус болады.
Алматыда да жауын-шашынсыз ауа райы болжанып отыр. Түнде ауа температурасы +15...+18, күндіз +29...+31 градусқа жетеді. Шымкентте түнде +18...+20, күндіз +32...+34 градус болады.
«Қазгидромет» Астана мен еліміздің 16 облысында дауылды ескерту жариялаған. Батыс өңірлерде жаңбыр, найзағай, бұршақ және екпінді жел күтіледі. Батыс Қазақстан облысында жел екпіні секундына 15-20 метрге дейін жетуі мүмкін. Атырау және Маңғыстау облыстарында да найзағай ойнап, жел күшейеді.
Солтүстік Қазақстан, Ақмола, Қостанай облыстарында, сондай-ақ Ұлытау мен Қарағанды өңірлерінде қатты жел мен шаңды дауыл қаупі бар. Кей жерлерде жел екпіні секундына 20-25 метрге дейін күшеюі ықтимал. Түркістан, Қызылорда, Жамбыл, Абай және Шығыс Қазақстан облыстарында да найзағай, шаңды дауыл және екпінді жел болжанған.
Сонымен қатар бірқатар өңірде өрт қаупі жоғары деңгейде сақталады. Қызылорда, Түркістан, Жамбыл, Ақтөбе облыстары мен Ұлытау облысының бірқатар аумағында төтенше өрт қаупі жарияланған. Астанада өрт қаупінің жоғары деңгейі болжанып отыр.
Бұдан бөлек, 8 және 9 қыркүйекте геомагниттік белсенділік күшеюі мүмкін. Дереккөздегі болжам бойынша, оның шарықтау шегі 8-інен 9 қыркүйекке қараған түнге сәйкес келеді.
