Бостандыққа шыққан актер Асқар Жұмабектің жаңа видеосы көпшіліктің жүрегін елжіретті

Бірер күн бұрын ғана бостандыққа шыққан отандық актер Асқар Жұмабек желіде видео жариялап, көңіліне медеу болған жандарға алғысын жеткізді, деп хабарлайды Malim.kz.

Асқар Жұмабек Instagram-дағы парақшасында үйінде жақындарымен бас қосқан сәтті көрсетті. Бір жылдан астам уақытын темір тордың ар жағында өткізген өнер иесі қолдау көрсеткен жақындарына ізгі тілегін білдіріп, ата-анасына шапан кигізді.

Бүгін жақындарым, достарым келіп отыр. Барлығыңа Алланың нұры жаусын, маған жақсылықтарың өздеріңе екі еселеніп қайтсын. Жақсы күндеріміз көп болсын. Ешкімнің басына түспесін, мұндай сынақпен ешқаймыңызды сынамай-ақ қойсын. Мұндай нәрсені жауыма да тілемеймін. Барлықтарың жүгірдіңдер. Білемін. Сендерге басымды иіп тұрып, рақмет айтамын. Әкешім, анашым, бауырларым, сіздерге де рахмет! Бауыр деген орны бөлек. Сіздерге деген ризашылығым шексіз. Бәрі жақсы болатынына 200 пайызға сенімдімін, - деді өнер иесі.

Айта кетейік, танымал актер былтыр қазан айында ұсталып, Алматы қаласындағы №2 Бостандық ауданы сотының шешімімен сотталған болатын. 2022 жылдың 28 желтоқсанында Алматы қаласындағы караоке-барлардың бірінде қонақтар мен мекеме қызметкерлері арасында жанжал шығып, оның соңы төбелеске ұласқан. Оның ішінде белгілі актер Асқар Жұмабек те болған.

Фото: instagram.com/askarzhumabeqov