Ләйлә Сұлтанқызы тойларды біріктіріп өткізуді ұсынды

Қазақстандық танымал тележүргізуші Ләйлә Сұлтанқызы тойдағы ысырапшылдықты азайтуды ұсынды, деп хабарлайды Malim.kz.

Сұлтанқызы қаптаған тойды біріктіріп өткізу әлдеқайда үнемді болар еді деген пікірін жеткізді. Себебі оқырмандарының арасында той істейміз деп қарызға батқандар көп екендігін алға тартқан. Бұған дейін ҚМДБ қыздың келісімімен мәһір мен қалыңмалды біріктіру туралы шешім шығарған болатын.

Мәһір де жоқ, тақыр да жоқ… Апам жүзік салынған бір пияла суды бәрі ішіп, неке қиятын заманнан. Мәһір мен қалың малдың қосылғанын да қолдап отыр.

Енді тағы ысырапшылдықты азайтсақ, иә? Өткенде «той жасадыңыздар ма, шашылдыңыздар ма, қанша кетті?» деп оқырмандардан сұрасам бола ма… Біразы қарызға белшесінен батқанын айтты. Иә, той деген береке, алыс-беріс, басқосу ғой. Дегенмен 2-3 сағаттың артын жылдар бойы өтейміз де жатамыз. Мысалы, тәтті шай, сырға салу, құдалық, тойды біріктірсек, оның өзі біраз үнемдеу. Сосын тойдың бәрі түсте болса қайтеді деп қоямын. Асқазанды ойлап жатқаным ғой… Ұйқы да, ағза да тыныш, - деп жазды тележүргізуші.

Фото: instagram.com/sultankyzy