Шымкент қаласындағы әлеуметтік нысандарды аралап шыққан сенаторлар №2 қалалық ауруханаға арнайы барып көрді. Былтыр тамыз айында осы ауруханадада жөндеу жұмыстары басталғанда сенаторлар құрылыс барысын көріп кеткен еді. Енді міне, сол жұмыстан кейінге аурухана тынысымен танысуға келген беттері. Олардың алдында қалалық денсаулық сақтау басқармасының басшысы Бақытжан Позилов қысылмай сөйледі. Ол
Шымкентте ашылған инсульт орталығы осы №2 қалалық ауруханаға қарайтынын, ал жүрек-қан тамырлары ауруларын дер кезінде, еш қиындықсыз анықтайтын ангиограф аппараты Қазақстан бойынша тек осы ауруханада бар екенін айтып өтті.
–Ангиограф – соңғы заманауи аппарат. Бағасы да қымбат, 800 миллион тұратын құрылғы күн сайын қаншама шымкенттіктің өмірін инсульттан сақтап қалуда. Әр түрлі позицияда түсіретін «Аполло»рентген аппараты да еліміз бойынша бізде ғана бар. Бұл құрылғылардың бәрі де мемлекеттің медициналық сақтандыру бағдарламасы бойынша тегін қызмет көрсетеді, - деді қалалық денсаулық сақтау басқармасының басшысы Бақытжан Позилов.
Өз кезегінде сенаторлар Шымкент қаласында атқаралып жатқан жұмыстарға ризашылығын білдірді.
–Қаладағы екінші ауруханада былтыр тамыз айында болғанбыз. Ол кезде күрделі жөндеу жұмыстары жүргізіліп жатқан болатын. Қазір толық іске қосылғанына көзіміз жетті. Көптеген медициналық аппараттары да жаңартылыпты. Денсаулық сақтау басқармасы басшысы 3 жаңа заманауи аппарат: ангиограф, КТ, рентгенді бізге көрсетті. Инсульт орталығы халық денсаулығын жақсартуға, ауру-сырқаудың алдын алуға қызмет етіп жатыр. Мұның бәрі қала тұрғындарына ауадай қажет нәрсе деп есептейміз, - деді Нұрлан Бекназаров.
