Бүгін кешке онлайн брифинг өткізген денсаулық сақтау министрі Елжан Біртанов елде коронавирус індетін 302 адам жұқтырғанын мәлімдеді. Оның екеуі 14 жасқа толмаған балалар.
"Коронавирус жұқтырған 79 адам шетелден келіп ауырғандар. 97 науқас басқа ауырып қалған адамдармен қарым-қатынаста болған. 131 адам осы елде ауырған, себебі белгісіз науқастар", - дейді Е.Біртанов.
Осылайша, ел ішінде жүріп, шетелден келгендермен де, олармен байланыста болғандармен де мүлде ұшыраспаған 131 адамның коронавирусты қайдан жұқтырғанын министрліктің өзі білмейді.
Министр осы ақпараттың негізінде төтенше жағдайлар жөніндегі мемлекеттік комиссияға елде карантин шараларын күшейту жайлы ұсыныс жасағанын жеткізді. "Осылайша барлық өңірде карантин шараларын күшейту туралы тапсырма берілді", - дейді ол.
Ауруға шалдыққан 8 адамның жағдайы ауыр, оның төртеуі өкпені жасанды жолмен желдететін құралдарға қосылған. 30 науқастың жағдайы орташа, қалған 244 адам жеңіл немесе ауру симптомдары жоқ көрінеді.
MalimBlocks
