Депутат Жаңбыршин атом энергиясы бойынша Франция өкілімен кездесті
Мәжілістің Экология мәселелері және табиғат пайдалану комитетінің төрағасы Еділ Жаңбыршин бүгін Францияның Атом энергиясы жөніндегі өңірлік кеңесшісі Александр Горбачевпен жүздесіпті.
Мәжіліс таратқан ақпаратқа қарғанда, кездесуде әңгіме Қазақстанда қолға алынған тиімді энергия саясаты, жасыл экономика қағидаттарын іске асыру болған. Яғни, атом энергетикасы және баламалы энергия көздерін дамыту жолында Атом станциясын салу талқыланған. Жалпы, Қазақстан 2060 жылға қарай көміртегі бейтараптығына қол жеткізуді мақсат тұтқан. Баламалы энергетиканы дамыту, оның ішінде атом энергиясын пайдалану мүмкіндігін зерттеуге президенттің арнайы тапсырмасы шыққан.
Оның үстіне президент Қасым-Жомарт Тоқаев былтыр Францияға ресми сапарлап барғанында атом энергиясын бейбіт мақсатта пайдалану жөніндегі ынтымақтастық декларациясына қол қойған.
«Атом энергиясы еліміз үшін маңызды, бірақ қандай технология қолданамыз және радиоактивті қалдықтардың әсерін қалай азайтамыз деген сұрақтар бар» депті Еділ Жаңбыршин комитет төрағасы әлгі жиында. Франция өкілі А. Горбачев болса, бірлесіп жұмыс істеуге дайын екендерін, Францияның атом энергетикасын дамытудағы жеткілікті тәжірибесін алға тартыпты. Жалпы, елімізде Атом электр станциясын салу қызу талқыланып жатқан тақырып. Былтыр Қазақстанның Энергетика министрлігі, «Қазақстандық атом электр станциялары» ЖШС, Ұлттық ядролық орталық, «KEGOC"»АҚ және «Қазатомөнеркәсіп» өкілдері арнайы Францияға барып, олардың тәжірибесімен танысып қайтқан еді.
Жалпы, бүгінгі таңда әлемде АЭС салудағы жетістігі мен қуатты реакторлық технологиялары бар төрт ел көш басында тұр. Олар кореялық KHNP, қытайлық CNNC, ресейлік «Росатом» және француздық EDF. Қазақстан осы елдердің тәжірибесін зерттеп көрген соң, өзіне қолайлысына таңдау жасамақ.
