Елордалық прокуратура жол қозғалысы қауіпсіздігі бойынша кеңес өткізді
Астана қаласы прокурорының орынбасары А.Ермахановтың төрағалық етуімен ведомствоаралық кеңес өтті.
Қауіпсіз қала қауіпсіз жолдан басталады. Қала әкімдігінің басшылығы, полиция департаменті өкілдері, жол қозғалысы қауіпсіздігін қамтамасыз етушілер қатысқан кеңесте талқыланған негізгі мәселенің бәрі осы сөзге келіп тірелді. Жол қауіпсіздігі жақсармай, қауіпсіз қала орнамайды.
Биыл жол-көлік оқиғасының жалпы санының төмендеуіне қарамастан, зардап шеккендердің саны артқаны айтылды. Жол көлік оқиғасының салдарынан 123 адам зардап шегіп, 6 адам қаза тапқан.
Прокуратураның үйлестіруімен елорда аумағында «Автомобиль» жедел профилактикалық іс-шарасы өткізіліп келеді. Бұл жұмыстың мақсаты құқық бұзушылықтарды анықтау және жүргізушілер мен жолаушыларға түсіндіру жұмыстарын жүргізу.
Жедел профилактикалық іс-шарасы кезеңінде жол жүру ережесін 9 397 бұзушылық анықталған. Құқық бұзушылар әкімшілік жауапкершілікке тартылған. Қауіпсіздік ережесін сақтамайтын жүргізушілерді жіліктеп қарасақ, қауіпсіздік белдіктерін тартып жүрмейтін – 1234, көлік тізгіндеп келе жатып, ұялы телефон пайдаланғаны үшін - 228 жүргізуші айыппұлға жығылған. Құжаттары жоқ немесе куәлігі жоқ адамның көлігін айдан жүрген 214 адам ұсталған. Ішімідік ішіп алып, көлікті тізгіндейтіндерге жазаң қатайғанымен, осы талапты пысқырмай, басқа адамдардың өмірін қауіпке байлайтындар өкінішке орай, әлі де бар екен. Мәселен, мас күйінде көлік айдағаны үшін сот шешімімен 43 адам 7 жыл мерзімге жүргізуші куәлігінен айырылған.
Жол оқиғасын көлік жүргізушілері ғана бұзбайтыны анық. Көп жағдайда жол көлік апаттарына жаяу жүргіншілер себеп болып жатады. Мәселен, жүргіншілер белгіленбеген жерден жүгіріп өтіп жатады. Ал аяқ-астынан жолға шыққан адамнан қашқан көлік екіншісіні соқтығысып, жандарын қауіпке байлап жатады. Ал бұл кезде жолды кесіп өтіп, көліктерді қағыстырып кеткен жүргінші оқиға орнынан қашып та үлгереді. Нәтижесінде көлік жүргізушісі кінәлі болып, шығынға батып жатады. Яғи, жүргіншілердің кінәсінен туындайтын жол көлік оқиғасының негізгі себептері – белгіленбеген орындарда жолдан өтуі. Іс-шарасы шеңберінде жол жүру ережесінің талаптарын орындамағаны үшін 2 652 жаяу адам әкімшілік жауапкершілікке тартылған.
Кеңеске қатысушылар елорда үшін осындай ең өзекті мәселелерді талқылап, оларды шешу жолдарын әзірледі.
MalimBlocks
