Құрмет Талапқазы бастаған еріктілер қуаңшылықтан зардап шеккен Маңғыстау облысына жинаған 10 вагон шөпті толық жібере алмай отыр. Еріктілер шөпті жеткізу үшін "Қазақстан темір жолы" ұлттық компаниясынан көмек сұрады.
Маңғыстауға алғашқы шөп вагондарын жөнелтіп, қазір Шетпеде жүрген ерікті Құрмет Талапқазы тағы бес вагон шөпті жөнелте алмай жатқанын айтты.
"Арыс, Шардара, Жетісай төңірегінде жиналған шөпті салайық десек, вагонға ақша төлеуге келіп қалыппыз. Сарыағаштан кеше бес вагон берген. Тағы бес вагон шөп бар. Соны басайық десек, ақша төлесін депті. Неге сөздеріңнен секіріп тұрсыңдар? Көмектесеміз дедік пе, көмектесейік", - дейді Құрмет Талапқазы.
Құрмет Талапқазының айтуынша, еріктілерден вагонды жалға алған компаниялар ақша сұраған.
"Қазақстан темір жолы" ұлттық компаниясының басшысына видеоүндеу жасаған ерікті Мұратбек Солтанбай бес вагонды жіберу үшін ақысын төле деген талап қойылғандықтан, оларға тиелген шөпті жерге түсіруге мәжбүр болғанын айтады.
"Мында бес вагон, үш вагон "Damu business group-тікі", өзіміздің бес вагон шөп тұр. Бүгін Маңғыстауға кетуі керек еді. "Қазақстан темір жолы" тегін жбереміз деген болатын. Әлеуметтік желіде кеше рахмет айтып едік, бүгін таңертең "жібермейміз, ақшасын төлеңдер, әр вагон ақысы 480-500 мың теңге деп отыр. Вагондарды тегін жатыр деген соң, төлейін деген ақшамызға шөп сатып алайық деп, төрт вагон шөп алдық. Қазір оны тиейтін жер жоқ болған соң, амалсыздан вагоннан жерге түсіріп жатырмыз", - дейді Мұратбек Солтанбай видеоүндеуінде.
Бұған дейін "Қазақстан темір жолы" ұлттық компаниясы мен "Қазтеміртранс" АҚ оңтүстікте еріктілер жинаған шөпті Маңғыстауға тегін жеткізуге уәде берген.
"ҚТЖ" басшысы бүкіл халық болып жұмылып игі іс атқарып жатқанда, көмек беремін не бермеймін деген шешіміңізді білуіміз керек", - дейді Мұратбек Солтанбай.
Malim.kz бұл мәселе бойынша "Қазақстан темір жолы" ұлттық компаниясының баспасөз қызметіне хабарласты. Бірақ баспасөз қызметі әзірге жауап бермеді.
Байланысты жаналықтар
MalimBlocks
